Vejîya werte ke tehqîqatê peyê kişîyayîşê Palmeyî de lîsteya kamyew PKKyij bitepişîyê hetê îstîxbaratê tirkan ra dîyaye. Goreyê raporanê nimiteyan ê îstîxbaratê Almanyaya Rojhelate zî kampanyaya reşkerdişê PKKyî de PDKyî zî ca girewt.
Serekwezîrê Swêdî Olof Palme 28ê sibata 1986î de Stockholm de kişîyabi. Sere de Almanyaya Rojhelate (Komara Demokratîke ya Almanya-DDR) welatê Ewropa û dewletê blokê sosyalîstî pê ney mergî şoq bibî. Çunke DDR de rejîmo sosyalîst estbi û têkilîya ci ya bi Palmeyî bibî. Coka îdareyê DDRyî zaf nêzdî ra kiştişê palmeyî ser o vindert.
Kişîyayîşê Pameyî ra dima rêxistina îstîxbaratî ya DDRyî Wezaretê Asayîşî û Îstîxbaratî ya Dewlete (Ministerium fur Staatssicherheit-MfS) ke bi nameyê Stasî zanîyeno, têgêra. Cînayetî ra 4 rojan dima bi fermanê Wezîrê Stasî Erich Mielke komîsyonê tehqîqatî ronîya. Komîsyon bi îdarekarîya Gunther Jackelî raporê ke agahîyanê ajananê xo yê almanan û welatanê bînan arê dayî, berdî verê Wezîrê Mielke.
Nika beşêkê nê raporanê ke 8 klasoran û bi seyan rîpelan ra yeno pê, arşîvê Ajansê Qeydê Stasî yê Almanya de derheqê ”rêçê kurdan ê” de ameyo amadekerdene.
ANFyo ke xo resna nê raporan tay agahîyê hêrişê vera PKKyî yê ke wisarê 1986î de dîyabî destpêkerdene, vetî werte.
Raporan de derheqê kiştişê Palmeyî de raporanê îstîxbaratî yê 7-11-12-16ê adara 1986î de beşê derheqê kurdan û PKKyî estê. Raporê 7ê adare de orjînalê eşkerayîya çapemenîye yê Temsîlkarîya Ewropa ya PKKyî esto. Nê raporî de yeno vatene ke PKKyî eşkera kerdo ke peyê kiştişî de ê çin ê, çimeyê Swêdî zî sey gumanbarê verênî îstîxbaratê tirkan qebul kenê.
Raporê Dayîreyê 22. yê Stasî yê 11ê adara 1986î de yeno vatene ke îstîxbarat û polîsanê tirkan derheqê endamanê PKKyî de hetkarîya yewinanê îstîxbaratî yê Swêdî kerde. Goreyê raporî yewinanê asayîşî yê tirkan belgeyê tehqîqatî yê serê PKKyijan dayê û derheqê Cemîl Bayik û Alî Haydar Kaytanî de agahîyê hîrayî dayî.
Raporê 12ê adare de zî agahîyê serê Cemîl Bayik û Kaytanî goreyê tehqîqatê Mudirîya Asayîşî ya Almanya (BKA) dîyayî. Rapor de ke îstîxbaratê almanyaya Rojhelatî muxabîran ra girewtê, yeno vatene ke Cemîl Bayik bi nameyê qodî ‘Şîyar’ Sûrîye de ciwîyeno, Alî Haydar bi nameyê qodî yê Fuat û Hawarî xeylêk reyî şino Almanyaya Rojawane.
Kampanyaya vera PKKyî de rolê PDKyî
Nê raporan de 3 rîpelanê raporê 16ê adara 1986î de yeno vatene ke PDK PKKyî sey mesuldarê kişîyayîşê Palmeyî vîneno. Nê raporî de ke goreyê pêvînayîşanê bi selahîyetdaranê PDKyî virazîyayo, yeno vatene ke goreyê PDKyî PKKyî nê di sebeban ra Palme kişto:
”PKK xora vera Palmeyî kampanya keno. Kişîyayîşê ey ra dima Swêd de PKKyijî ameyî destbendkerdene, PKKyî zî bi nê hawayî qesas girewt. Palmeyî kurdan ra zaf hes kerdêne û dewleta tirke naye ra ecîz bîye. Beno ke ajananê ke mîyanê PKKyî de bîyê, Palme kişto.”
Palmeyî tim waştêne tedaya vera kurdan biqedîno la cînayetê Palmeyî erzîya milê kurdan. Cînayetî ra dima polîsan eşt keyeyanê kurdan ser, xeylêk kurdî eştî qereqolan. Almanya de zî heman rewşe qewimîyaye.
Çapemenîya Almanya, Swêd û Tirkîya seba ke cînayet bierza kurdan milî cehd kerd, xeberê zûrî weşanayî. Cînayetî ra di serrran dima 1988 de ‘Dewaya Dusseldorfî’ ya vera PKKyî dest pêkerde û Duran Kalkan, Alî Haydar Kaytan û Huseyîn Çelebî zî tede tay PKKyijî tîya de ameyî muhakemekerdene.
Rayberê Şarê Kurdî Abdullah Ocalanî no cînayet sey ‘gama verêne ya komployê mîyanneteweyî’ ercnabi.
36 serran ra dima 10ê hezîrana 2020î de Swêdî bi hawayêkê fermî pare kerd ke eleqeyê kurdan û PKKyî bi cînayetê Palmeyî çin o. Serdozgerîya Swêdî eşkera kerd ke vergumanê cînayetî Stig Engstromî yo ke 2000 de merdo. Bi nê hawayî dosya qefilîyaye.
La hukmatê Swêdî hema zî kurdan ra û têgêrayîşê azadîye ra uzrê xo nêwaşto. Çime : ANF
