Federasyona Komeleyên Piştevanî û Hiqûqî yên bi Malbatên Girtî û Hikumxwaran re ya Medê (MED-TUHAD-FED), dê ji bo guhertina Hevserokatiya xwe di 30 Îlonê dê li Otela Demîr a navçeya Sûra Amedê kongreyekê li dar bixe. Di kongreyê dê mijarên tecrîdkirina Rêberê PKK’ê Abdûllah Ocalan û hemû girtiyên li zîndanan rastî îşkenceyekê giran tên bibe rojev. Rewşa girtîgehan roj bi roj girantir dibe. Armanca vê kongreye bi rexistinkirina malbatên girtiyan e. Hevserokê MED-TUHAD-FED’ê Zekî Baran der barê kar û xebatên xwe de û ji bo li dar xistina kongreye nirxandin kir.
Hevserokê MED-TUHAD-FED’ê Zekî Baran diyar kir ku armanca wan a vê kongreyê ew e ku bi ruh û hişmendiyeke nû bibin bersiv û wiha got: “Dibe ku gelek kêmasî çêbûbin. Lê ew qas xebat û ked jî hat kirin. Dîsa jî pêdivî bi kongreyê heye. Divê ku carinan rêveberî bê guhertin. Ev kongre ne kongreyeke ji rêzê ye. Tecrîda li ser birêz Ocalan, li hemû girtîgehan tê meşadin û bûye sedema xitimandina siyasetê. Hewceye ku em pêvajoyeke nû bidin destpêkirin. Tenê xwesteka vê kongreyê hişmendiyeke zelal bide pêşiya xwe û dest bi peywira xwe bi cih bîne. Divê ku ji rêberê gelê kurd re azadî û ji pirsgirêkan re jî çareseriyekê bê avakirin.”
Pîvan û sinc tune ye
Baran, destnîşan kir ku raste rast peywira federasyonê rêxistinkirina malbatên girtiyan e û wiha got: “Divê ku em bi hemû pirsgirêkên girtîgehan re eleqedar bibin vê berpirsyariyê bi cih bînin. Rêvbeberiyên me jî çi xebat kiribin li ser kedeke baş kirine. Çi ked hatibe kirin dê mirov li gora wê encamê binirxîne. Jixwe wekî ku em dizanin tecrîda li ser birêz Ocalan 25 sal in didome. Bandora tedrîdê li ser civaka kurd û li Rojhilata Navîn jî tê kirin. Ev tecrîd bûye sedema gelek qeyran û qêrînên kûr. Ev tecrîda heyî dibe sedema qeyrana siyasî, aborî, polîtîk û siyaseta Dewletên Navneteweyî. Her çiqas dewlet ev tişt weke şer nede pênasekirin jî lê ev tişt şer bixwe ye. Di vî şerê de tu pîvan û sinc tune ye. Gelek caran bi awayekî bêexlaqî tevdigerin her roja ku xwezaya me û goristanên me ji aliyê dewleta tirk ve neyên texrîbkirin tune ye. Divê li dijî van hemû bêexlaqiyan berxwedaneke mezin bê meşandin.”
Berxwedaneke birûmet
Baran, got ku birêxistinkirina malbatan dê bive amûr ji şikestina tecrîdê re û wiha pêde çû: “Dema ku ev tişt ji holê bê rakirin birêz Ocalan û hemû girtî bigihêjin azadiya xwe ya fîzîkî dê gelek tişt bêne çareserkirin. Divê tecrîd û şerê qirêj bi dawî bibe. Em îro vê pergala heyî wekî sondxwarên neyarên kurdan didin pênasekirin. Jixwe ji neyarekî ku sonxwarî be hêviya rehmê jî jê nayê kirin. Tenê tişta ku ji destê me tê em ê bi berxwedaneke bi rûmet wî mecbûrî çareseriyê bikin. Li hemberî van hemû kiryarên ku têne kirin divê hemû malbatên girtiya bibin yek deng. Ji ber ku li girtîgehan her roja îşkence li hevalên me neyê kirin tune ye. Divê em li dijî van bibin yek deng.”
Tundî û îşkence
Baran têkildarî hemû girtiyên ku di tecrîda giran de ne jî axivî û ev bang kir: “Em bang li hemû kesên ku dibêjin em xwedî wijdanin û merhametin bila xwedî li vîn û baweriya gelê xwe derkevin. Ji ber ku li girtîgehan îşkenceyeke gelek mezin li hevalên me tê kirin. Divê gelê kurd li dijî van kiryaran dengê xwe bilind bike. Em dixwazin ku her ferdekî civakê bibe dengek li dijî van bêhiqûqiyên ku tên kirin.”
