Hetê hêzanê komploger û dewlete ra vera Serekê PKKyî Abdullah Ocalanî komployêko mîyanneteweyî ame organîzekerdiş û ma nê rojan de kewenê 25ine serra komployî ke Ocalan 15ê sibate de teslîmê Tirkîya ameybî kerdiş. Şaro kurd û dostê ci 15ê sibate sey roja sîya bi name kenî û bi protestoyanê cîya cîyayan raşteyan de yî. Emserr her serre ra hîna zêde tewrbîyayîşê protestoyan, paştîdayîş est o. Çalakîyanê azadîye rê eleqeyêko gird dest o.
Sere de Kurdistan û xeylê welatanê Ewropa de seba azadîya fîzîkî ya Abdullah Ocalanî û seba protestokerdişê komployê globalî çalakî yenê kerdiş. Înan ra yew zî çalakîya rayraşîyayîşî ya. Rayraşîyayîşê Azadîye Kurdistan de raştê eleqeyêkê girdî yeno û şar raywanan bi heyecanêkê girdî pêşwazî keno. Armancê rayraşîyayîşo ke di baskan ra dest pêkerd azadîya fîzîkî ya Serekê PKKyî, şikitişê tecrîdî, akerdişê berê Îmraliyî û Ocalanî reyde pêvînayîş o. Baskêk Qers û baskêk zî Wan ra dest bi rayraşîyayîşî kerd. Raywanê azadîye qeza, dew û bajarê ke derbaz benî de bi coşêkê girdî yenê pêşwazîkerdiş û şar herikîyeno raşteyan. Raşteyê çalakîyan de siloganê azadîye zimenê û helecanêko gird herême de est o.
Seke yeno zanayîş ma serra 24ine ya komployî xo pey de verdenê. Nê esasan ser de şaro kurd qerardar o ke serrgêra 25ine ya komployî de raşt vindero, komployî binî ra çinî bikero û azadîya fîzîkî peyda bikero. No tesilî yo ke şaro kurd bi israr û qerardarî têkoşîn keno ke problemê kurdan çareser bibo.
Armancê komployî û hedefê ci
Seke yeno zanayîş hewldayîşê komployî 9ê teşrîna verêne ya 1998î de dest pêkerd. Hêzanê komplogeran 4 aşman no proses rayîr ra berd. Nê prosesî de dî ke bi Ocalanî nêeşkenê, coka ra na reye 15ê sibata 1999î de teslîmê Tirkîya ame kerdiş û daliqnayîşê ci ame hedefkerdiş. Bi destpêkerdişê komployî vatêne qey do yew roje de netîce bigêrî û Ocalanî bê tesîr bikerî. La armancê înan nêşî sere û planê înan xerepîya. Waştêne ke Kurdistan de sîtemê îmha û înkarî bikerî dewre. Daliqnayîş ameyêne hedefkerdiş. Teslîmkerdiş ra dima Tirkîya mîyanê xo de kewt munaqaşayanê hîrayan. Hukmatêko newe ame sere. 18ê nîsana 1999î de weçînayîş ame kerdiş û Ecevît newe ra ame sere. DSP, MHP û ANAPî reyde tîfaq û koalîsyon virazîya. Koalîsyonêko sosyal-demokrat, lîberal û nîjadperset vejîya raşte. Hukmat zaf teng bîbî. Munaqaşayan ra dima tewr peynî qerarê daliqnayîşî nê qerarê muebetê giranî yê zîndanî ame dayîş. Çele 2000 de no qeraro fîîlî ke gêrîya, bî qanûn. Bi no hawa Tirkîya de daliqnayîş ame wedaritiş û herinda ci de cezaya muebetê giranî ameye. Yanî herinda daliqnayîşî de na reye sîstemê îşkence û tecrîdî fînîya dewre. Tîya de ame hedefkerdiş ke îdeolojî û sîyasî bêrî binfînayîş.
Bi polîtîkaya rijnayîşî Ecevîtî waştêne problemê kurdan bêro tasfîyekerdiş. Bi tecrîdkerdişî rijnayîşê fehmêkî ame hedefkerdiş û bernameyêko winasî ame awankerdiş. Esasê qewimîyayîşan de na babete estbî. Hêzanê komplogeran hesab nêkerd ke Rayberî ewja ra reyna zî fehmê xo vila keno. Çimkî vatêne şertê Îmraliyî giran î. Bawerîya înan bi şertan estbî. Mumkun nêbî ke çîyêko winasî bibo. Vatêne qey do çend serran de têgêrayîşê azadîye nêkewo pêrodayîş, xo newe nêkero û vila bibo. Planê îmha û tasfîyekerdişê wina texmînan kerdêne.
La rayîrê hîrêyinî, felsefeya Rayberî û paradîgma heme planî veng vetî û fehmêko newe yê Îmraliyî awan bî. Hêzê ke waştêne bi tecrîd, îşkence û teda her çî safî bikerî, ser nêkewtî. Şar wayîr vejîya û komplo veng vet. Şarê kurdî û dostanê ci sozê girêdayebîyayîşî da. Bi wayîrvejîyayîşî heme taktîkî veng ameyî vetiş.
