Li Afganistanê, Talîban jiyanê li jinan diherîme û maf û azadiya wan bi sînor dike. Beriya du hefteyan Talîbanê çûna jinan a zanîngehê qedexe kir. Tevî bertekên li dijî xwe jî vê carê karkirina jinan a li saziyên sivîl ên herêmî û biyanî qedexe kir.
Wezareta Aboriyê ya Afganistanê, der barê mijarê de biryarnamekê weşand û ragihand ku karkirina jinan a li saziyên sivîl ên herêmî û biyanî hatiye qedexekirin.
Li aliyê din bertekên li dijî biryara Talîbanê ya ji bo qedexekirina çûna jinan a zanîngehê jî didomin. Di vê çarçoveyê de 60 profesoran bi armanca şermezarkirina biryara qedexekirina çûna zanîngehê ya jinan ji peywirên xwe yên zanîngehên Talîbanê îstifa kirin.
