1Mîyanê Mazlûm Ebdî û Serekê demkî yê Sûrîye Ahmed El Şara de yew mutebaqat îmza bîbo zî hêzê Hukmatê Demkî û hêzî ke gireydaye yê Tirkîye yî hêrişanê xo dewam kenê.
Hetan eyro bi hezaran elewî û durzîyî qetil kerdê. Hima zî nê hêrişanê xo de israr kenê. Ahmed Şara wexto ke Amerîka ra, Ewropa ra û dewletanê ereban ra destek gêno, nêwazeno ke DSG reyde diyalog virazo. Mesela wexto ke hêrişê elewîyan kerd, Dinya ra yew bertekêko pîl dîy, no bertekî dima DSG reyra dekewto tekilî. Dima zî wexto ke Durzîyî qetlîaman ra vernayê, rayna dinya de yew tepkî dîy û DSG reyra dekewto tekili. Nê rojan de zî Palmîra de yew elemanê asayîşî yê Wezaretê Zerrîyî yê Sûrîye, gala leşkeranê Amerîka kerd, di leşker û yew sivîl tede hîrê hemwelatîyê Amerîka qetil kerdê. No hedîseyî ser o, ko rayna tepkî veyno û DSG reyra bidekewo têkilî.
Ordûyê Sûrîye mîyan de, bi desan rêxistinî estê. Nê rêxistinan mîyan de DAIŞ’î zî estê. Xo ra no hedîseyo peynî de elemanê DAIŞ’î, hîrê amerîkayijî kiştê. Nê DAIŞ’an, nê serranê verînan de sereyê merdiman derra kerdinê, merdîmî ganî-ganî veşnaynê. Tewr zaf kurdî qetil kerdê. Cinîyê kurdan remnaynê, tecawuzê înan kerdinê û pazaran de rotinê. Nê merdimî gonîya kurdan firbikerê mird nêbenê. Yew qala verênanê ma esta, vanê ke; “Mela çuwa nêdekewo korî dest.” Eke eyro zî firset veynê, rayna ko qetlîamanê xo dewam bikerê. Ma kurdî, înan zaf baş nas kenê, eke yewerî qetil nêkerê, ko yewbînan qetilbikerê. Şewa tarî şan ra bellî ya. Nê merdimi; heq û huqûqî ra, edaletî ra, aştî ra çîy fam/fehm nêkenê. Na ra binê Hukmatê Sûrîye de, yew zemêno sermitikin/şemitok esto. Na rewşe de, cuyê Ahmed Şarayî zî emnîyet de nîyo.
Ahmed Şara tede, heme kadroyê Hukmatê Sûrîye û ordûyê Sûrîye, kulturê demokrasî ra dûrî yî. Xo vêşêr yewerî qebul nêkenê. Ferasetê înan, firêzeyê/kerdeyê înan ra bellî yo. Mesela orduyê mîyan de, dayîreyanê Dewleta Sûrîye de, cinîyan qebul nêkenê. Bi nê ferasetî, Sûrîye de huzur serê xo nêgêno. Aye ra tek yew rayîr maneno. No rayîr zî; kurdan, durzîyan û elewîyan û mûxalîfanê Sûrîye reyde pêamîyîş o.
Yewna het ra mîyanê Hukmatê Sûrîye û Îsraîlî de nakokî esta. Dewleta Îsraîlî, bawerîya Hukmatê Sûrîye nekeno. Na ra xo rê yew herêmo tampon awan kerdo. Eke Hukmatê Ahmed Şara SDG reyra pê bêro, Îsraîl zî ko nê hêrişanê xo ra fek verado. Eke yew Sûrîyeya demokratîke awan bibo mîyanê Sûrîye û Îsraîlî de şer qedîno.
Kurdî xoserî wazenê, semedo ke bi heqanê xo yê xozayî biciwîyê, bi qanûnê bingeyî teminat wazenê.
DSG wazena ke, fermandarîya xo, bi no halê xo yê mewcûdî de bikewo binê Wezaretê Pawûtoxîyeya Sûrîye. Kurdî, Rojava de zî îdareyê Otonomî wazenê. Goreyê ma zî Sûrîye de, kurdî tede, durzî, elewî û şarê bînî, ancax bi yew xoserîya demokratîke û bi qanûnê bingeyî azad benê. Tersê ey de, şaran mîyan de seyyewbînanî înşa nêbena.
Dewleta Tirkîye zî hetan eyro PKK bahane kerdinî û meseleya kurdan çareser nêkerdinî. La nika no bahane zî nêmendo. PKK fek çekan ra verradana û wazena ke zemêno demokratik de sîyaset bikero. Xora na ser o, Meclîsê Tirkîye de, yew Komîsyon awan bîyo. Nê komîsyonî, terafan reyra pêveynayîşî/dîdarîyî kerdê. Nê rojan de partîyê sîyasîyî zî raporê xo hedre kenê û teslîmê Komîsyonî kenê. Dima zî Komîsyon ko raporê xo hedre bikero û teslîmê Meclîsê Tirkîye bikero. Dima zî Meclîsê Tirkîye, ganî rolê xo kaybikero, semedo ke na mesela kok ra çareser bibo, ganî qanûnanê aştî û demokrasîyî vejo.
La aseno ke Dewleta Tirkîye, nêwazena ke kurdê Sûrîye wayîrê yew statuyî bibê. Na ra Dewleta Tirkîye wazena ke, sey yew şertê pêameyîşî, DSG çekanê xo teslîmê Hukmatê Ahmed Şarayî bikero. Kurdan vera DAIŞ’î yew têkoşîno zaf bi bedel dayo. Na rewşa Sûrîye de û nê şertan de, no waştişê Dewleta Tirkîye, yew waştişêko maqûl nîyo. Dewleta Sûrîye, yew leteyê Dewleta Tirkîye nîya. Eleqeyê pêameyîşê Tirkîye û yê Sûrîye çino. Na zî eşkera ya ke eke Tirkîye de aşîtî serê xo bigêro, kurdî Sûrîye zî vera xo tadanê Tirkîye. Çunku Tirkîyeyêka demokratîkê, şaranê Rojhilatê Mîyanênî rê bena sey model. Na cografya de zaf gonî bila bîya. Na seserre de, kurdan û şaranê Rojhilatê Mîyanênî, qet yew huzur nêdîyo. Rojhilatê Mîyanênî de, şer yew qeder nîyo.
Eke Tirkîye de û Sûrîye de yew aştî înşa bibo, Rojhilatê Mîyanênî de ko bi temam şer biqedîyo û yew dewro newe dest pêkero.
