Roniştişanê Komîteya Vera Cezakerdişê Kerdişanê Xiraban û Qijvistişî ya Neteweyanê Yewbîyayeyan (NY) 8ê temmuze de dest pêkerd û ê do heta 26ê temmuze dewam bikerê. Çarçewa roniştişan de derheqê tayê sûcanê dewleta tirke de xebatî yenê kerdene.
Temsîlkaranê rêxistinanê komelê sivîlî derheqê sûcanê şerî yê Tirkîya de raporêk pêşkêş kerd. Nê raporî ser o roniştişanê 17-18ê temmuze de Tirkîya rê persî do bipersîyê.
Maloca Internationale derheqê binpaykerdişanê heqanê merdiman ê herêmanê binê îşxalê Tirkîya de raporêk pêşkêşê CPTyî kerd û bale ante sûcanê şerî yê dewleta tirke û cerganê ci.

Rapor de dîya zanayene ke dewleta tirke seba ke Sûrîye de tesîrê kurdan bikero, mudaxeleyê herême kena û wina ame vatene: “Tirkîya Vakurê Sûrîye (Rojawan) de operasyonê leşkerî yê cîyayî dayî destpêkerdene. Nê operasyonan de herêmê binê kontrolê kurdan ameyî hedefkerdene. Nê operasyonî bîyê sebeb ke nufusê kurdan herême de bikêmîyo, binawanîye texrîb biba û xeylêk sivîlî bimirê.

Komê sûrîyayîjî bi destekê Tirkîya xeylêk kerdişanê sey îşkence, înfaz û remnayîşê sivîlan kenê, derheqê nê sûcan de raporî est ê. Hêzê tirkî nê koman koordîne kenê. Sûrîye de têgêrayîşê Tirkîya tesîrê merdimatîye kenê. Şaro kurd Tirkîya de û Sûrîye de raştê zehmetî û binpaykerdişanê heqan ê cidîyan yeno. Ganî nê meseleyî bêrê ercnayene û komelo mîyanneteweyî hesab biperso. Ganî hetkarîya merdimatîye bêra kerdene û seba çareserîya meseleya kurdan xîretêko hempar bêro îdarekerdene.

Operasyonê leşkerî yê Tirkîya bîyê sebeb ke kurdî bi zorî wareyanê xo ra bibê. Merdimî raştê îşkence û kerdişanê xiraban yenê.”