Kurdistanijanê ke Ewropa de bi çalakîyan Qirkerdişê Şingalî şermezar kerd waşt ke statuyê Şingalî bi hawayêkê fermîyî bêro şinasnayene.
3ê Tebaxa 2014î de DAIŞî Şingal de bi hezaran êzidîyî qir kerdbî, cinî û domanê êzidîyî remnabî. Serrgêra 8. ya qirkerdişî de vizêr xeylêk şaristananê Ewropa de kurdistanijî û dostê înan vejîyayî meydanan û înan qirkerdiş protesto kerd, qurbanê qirkerdişî yad kerdî.
Çalakîyan de ame vîrvistene ke wextê qirkerdişî de hukmatê Iraqî û Îdareyê Herêma Kurdistanî êzidîyî nêpawitî û dewleta tirke de paştî daye DAIŞî. Çalakîyan de alayê YPG, YPJ, HPG, YBŞ û PKKyî, fotografê Rayberê Şarê Kurdî Abdullah Ocalanî ameyî kiriştene; sloganê sey ‘Bimiro îxanet’, ‘Şehîdî nêmirenî’ ameyî vatene. Qiseykerdişan de ame waştene ke wa Qirkerdişê Şingalî sey jenosîdî bêro qebulkerdene, bi hawayêkê fermîyî statuyê Şingalî bêro şinasnayene, wa wayîrê Şingalî bêro vejîyayene, hêrişê dewleta tirke yê vera Şingalî bêrê qedînayene.
