Dewaya sîyasetmedarê kurdî Kenan Ayazî şaristanê Hamburgî yê Almanya de dest pêkerd. Ayaz Kibris de amebî tepiştene.

Kenan Ayazo ke aşma hezîrane ra Zîndanê Damtorî yê Hamburgî de yeno tepiştene derheqê ci de madeyê 129byî yê Qanûnê Ceza ya Almanî ra dewa ameye akerdene. Vizêr Mehkemeya Eyaletî ya Hamburgî de roniştişo verên ê dewa ame vînayene. Kenan Ayazî kesê ke tewrê mehkeme bîyî bi nîşanê serkewtişî selam kerdî.

Mutalaya dozgerîye de Kenan Ayaz yeno sûcdarkerdene ke serranê 2018-2019an de Hamburg û dormeyê ci de faelîyetê sîyasîyî kerdî û yeno waştene ke goreyê madeyê 129byî bêro cezakerdene. Avûkatê Ayazî Antonia Von Der Behrensî vist vîrî ke muwekîlê ci dewaya KCKyî ra Tirkîya de 13 serrî zîndan de mendo û vat, “Kenan Ayaz çirey tewrê şîdetî nêbîyo. Rîyê menfaetê ekonomîkî yê mabênê Almanya û Tirkîya yeno muhakemekerdene. Na dewaya huqûqî nîya û ganî cade bêro qefilnayene.”

Gama ke roniştişî dewam kerdêne verê mehkeme de hetê Înîsîyatîfê Kenan Ayazî ra çalakîya paştdayîşî ameye kerdene. Parlamenterê AKELî yê Kibrisî Giorgos Koukoumas zî tewrê çalakîye bi û vat, “Rixmo ke Kenan Ayaz tewrê serebûtanê şîdetî nêbîyo sey  ‘terorîstî’ yeno name kerdene ke no nîno qebulkerdene. Ma nê tewirê Almanya şermezar kenê.  Ma paştî danê têkoşînê azadîye yê kurdan û wazenê wa PKK lîsteya terorî ra bêro vetene.”

Anja Flacha ke bi nameyê Komîteya Azadîye qisey kerd, Kenan Ayaz sey şervanê azadîye name kerd û vat ê zî erjanê ey pawenê û tim paştî danê ci.

Birayê Ayazî Orhan Ayazo ke semedê mehkeme Swêdî ra ame, vat înan sey keyeyî bedelê pîlî dayî û do heta peynî dewaya xo bidê domnayene.

Dewaya Kenan Ayazî do 7ê kanûna peyêne roja sêşemeyî dewam bikero.