Tirkîya de ciwîyayîşe qet asan nîya. Eke merdim taqîbkerdoxê rojeve bo, her serebûtî de şoqê beno û vano, hende zî nêbeno! La çi heyf ke beno. Ne sanikî ne zî hîkayeyan de çîyêk winasî nêameyo ciwîyayîş. Êdî hûtê sanikan verê însanê nê zemanî de bîyê sey melayîketan. Eke roje bêra nê çîyî bêrê qalkerdiş do kes bawer nêkero hende çîyê bobelatan ra. Labelê ma bi xo benê şahidê nê çîyan û ma tena benê temaşekerdox.
Temaşkerdoxî ganê ma bidejno zî la ma reyna zî reaksîyonêk pîl nêmojnenê ra. Sey serebûtê Muslumeya şenike! Mersîn de tuta 3 serrî Muslume amebî vînîkerdiş û dimayê 10 rojî, cesedê aye 7 kîlometreyî keyeyê ci ra dûrî amebi vînayîş. Dimayê cigêrayîşî vejîyabi werte kalikê Muslume Hasanî aye îstîsmar kerdo û kişto. Bobelata serê bobelate dimayê DNA vejîya, kalik pîyê Muslume yo. Yanî dadîya Muslume hetê vistewreyê xo ra rastê tecawuzî ameya. Tabloyêk wehşet, cuyêka xidare! Ganî vera nê wehşet û bêexlaqîye de Tirkîya bilerzîyayîne û bikewtêne kuçeyan. No çîyêk normal nîyo! Gama ke merdim nê çîyan vîneno yan zî eşnaweno gonîya merdimî lerzena!.. Senîn dadî çend rey tecawuzî dir yena rî bi rî û tersî ra vengê xo nêkena! Gelo kes çinîbî paştîdayîşê dadîye bikerdêne û vera kerdişê şîdetî û tecawuzî bivendertêne. Eke kesî hêz bidayîne dadîye, paştî bidayîne ci ewro Muslume zî nêmerdêne. No ramojneno ke dadîye tena ameya verdayîş û ameya tersnayîş. Komelêko eke nê çîyan hezm bikero, êdî ver bi çinkerdîşî de yo. Komelêk tecewuzkerdişê tutan, cinîyan, heywanan xo rê nêkero xem, o wext merdim senîn eşkeno êdî mîyanê ê komelî de cuya xo dewam bikero û sey “komel” biname bikero. Serebûtê winasî ganî ma hemine bidejnê û ma vera nînan de reaksîyonêk pîl ramojnê ke êdî kes teşebusê çîyêko wina nêkero.

No serebût demêko rojeve de bi, çend rojî dima serê medyaya dîjîtalî de dîmenêk bîn yê wehşetî kewte vernîya ma. Dîlok de babîyêk dergûşê xo yê 3 mengî bi hawayêko xidar derb kerdêne. Dadîye semedo ke mêrdeyê xo rê şik kena, telefonê xo oda de verdena û vîdeo akena. Telefon zî mêrdeyê ci, ci rê nêgirewto. Şina dadîye xo ra wazena. Tîya ra mojneno ke mêrde xora kesêk senîn o. Dimayê ke vengê bermayîşê derguşî yeno şina oda la mêrde sey çîyêk nêbîyo têgêreno. Sey xora tut bermeno, o zî ey vindarneno. Dimayê ke dadî ewnîyena vîdeo ra vînena ke qaşo babî, çike merdim nêeşkeno nê winasîyan ra vajo babî senî derguşê ci derb keno. Tut keweno qoma. Gelo merdim êdî kamî ra û çira bawer bikero. Eke babîyêk dergûşê xo ra wina keno o wext cayê vatişî nêmaneno. Dimayê di rojî dadîyêke dergûşa xo kişena û kena soba. Êdî çew wazeno ke dinya biqelibya û ma heme nê wehşetan ra bixelisyê. Ne heke ne zî di hebê. Wina aseno ke hûmarêke zêde komel de cayê xo gêna û zirar dana derûdorê xo. Semedê nê çî zî rehabîlîteyêk pîl komelî rê lazim o. Ganî her kes nêbo dadî û babî. Ê ke wayîrê tutanê xo nêvejênê, heskerdişê înan çinî yo, meylê înan serê şîdetî de yo, ganî tutan ra û tutbîyayîşî ra dûrî vinderê. Kes mecbûr nîyo nê psîkopatîyê înan rê maruz bimano. Semedê nê zî raştî de rehabîlîteyêk baş lazim o komelî rê.

Tewr peyîn zî rojeve de binpaykerdişê heqê merdiman ê zîndanan kewte vernîya ma. Garîbe Gezera ke 9ê kanûne de Zîndanê Kandirayî de Hewteyê Heqê Merdiman yê Dinya de dinyaya xo bedilnaye. Her çiqas serebût sey ‘xokiştiş’ bêro namekerdiş zî otopsî bê avûkatan û keye amebî kerdiş û no zî ramojneno ke senî dinyaya xo bedilnaya. Çike Garîbe xeylê îhlalkerdişê zîndanî vetibî werte û çîyê ke ci rê amebî kerdiş qalî kerdibi. Mektube ke Jin News rê şawitibî uca de caardişê ke rastê ci amebî vatibî û waştibî ke vengê ci bêro eşnawitiş. Îstîsmarê cinsî, hucreya yew kesî û odaya sungerî û derb û şîdetê psîkolojîk her tewir çî ardibî sereyê Garîbe. Garîbe zî vera kerdişanê înan sereyê xo nêtewênabi. Xora hende caardişî semedo ke îradeyê ci bişiknê kerdibî. La hêzê Garîbe nêqedênabî û waştî ke vengê aye bibirnê. Garîbe zî veng dabi ma semedo ke ma tebera hemverê nê bê însanetî çîyêk bikerê la reyna zî reaksîyonê ma qels mendî. Gelo ma do key vengêke xurt vejê û vera îhalkerdişan de bibê cewabêk xurt? Ma do key bibê vengê zîndanan, vengê mazluman, vengê feqîr û multecîyan? Hema ke zaf erey nêbîyo ma vengê xo yew bikerê û biqedênê pêro lêşinîyan.