Cerganê DAIŞî 3ê tebaxa 2014î de hêrişê Şingalî û şarê êzidîyan kerdbî. Hêrişan ver bi seyan êzidîyî ameybî qetilkerdene, bi hezaran zî hetê cergan ra ameybî remnayene. Wextê qetlîyamî de êzidîyan verê xo dabî Koyê Şingalî û nê hêrişî sey Fermanê 74. yenê pênaskerdene.
12 hezar peşmergeyê PDKyî û 7 hezar hêzê pawitişî yê Iraqî yê ke pawitişê Şingalî ra berpirsîyar ê, gama ke hêrişî dest pê kerd xo dima nêewnîyayî û remayî. Tam wextê winayênî de koma ke 12 gerîlayan ra pê ameyêne, seba ke verê qirkerdişî bigêro kewte rayîrê Şingalî.
Şaro qedîm ewja de teslîmê destê cerganê hovan ame kerdene û qirkerdişêko pîl ame viraştene. Aye roje Şingal sey cayê qîyametî bî.
Doman, cinî, kal û pîrî verê xo dayî Koyê Şingalî. Kesê ke nêeşkayî biremî yan ameyî qetilkerdene, yan ameyî remnayene, yan sey kole bazaran de ameyî rotene û yan zî çarçeweya faelîyetanê rêxistine de ameyî şuxulnayene. PDKyî herra xo û şarê xo teslîmê destê hovan kerd. Nîmeyê cinî û domananê ke ameyî remnayene, ame xelisnayene la aqûbetê bînan nîno zanayene. Kesanê ke ameyî xelisnayene ra yew zî Rûsîta Haci Baco ya. Rûsîta Kampa Holî ra xelisîyaye.
Bi xelisnayîşê aye tradîsyon û trajedîya ke cinîyanê êzidîyan ciwîyayî reyna dekewtî rojeve. Bado ke Baguz cergan ra yeno xelisnayene, Rûsîta Kampa Holî de yena cakerdene. Rûsîta hêrişê 3ê tebaxe de wexto ke keyeyê ci reyde remena Koyê Şingalî, kewena destê cergan.
Babî û 3 datê Rûsîta yenê qetilkerdene, dayîka aye bi destê cergan yena herimnayene û xo kişena. Goreyê malumatanê fermîyan Şingal de 400 hezarî ra zêde kesî qirkerdişî ra ver ciwîyayêne. 5 hezarî ra zêde kesî ameyî qetilkerdene, 7 hezarî ra zêde cinî û domanî ameyî remnayene, bi desan gorê komî ameyî dîyene û 10 hezarî ra zêde kesî sey esîr kewtî destê cergan. Hêrişê vera Şingalî rayaumûmîya mîyannetewîye de veng da û vera DAIŞî hêrişî dîyayî destpêkerdene.
