Şingal de tayê terefdarê sîyasî bê îradeyê êzidîyan kenê ke mîrêkê newî îlan bikerê. Şarê Şingalî vano ke ê do nê mîrî qetî qebul mekerê.

Endamê Heyetê Îdareyî yê Konseya Eşîran Mîrza Bekîrî eşkerayîye wende. Bekîrî da zanayene ke tay terefdarê sîyasîyî wazenê mîrêkê neweyî îlan bikerê. Bekîrî vat: “Bê îradeyê Îdareyê Xoserî û Meclîsê Eşîran çîyo winayên mumkîn nîyo. Mîr hetê şarê Şingalî ra yeno weçînayene û şarê Şingalî zî tîya de yo. Ma Mîr Salimo ke Amerîka ra ameyo qebul nêkenê. Mîrê ma Mîr Nayîf o. Ma sewbîna yew mîrî qebul nêkenê.”

Hemserekê Îdareyê Xoserî Xwedêda Îlyasî pare kerd ke Heyetê Mîrîye wextê Fermanê 2014î de çîyêk nêkerdo la ewro salona otêlan de mîran tayîn keno. Îlyasî vat: “Ganî hêverî mîr xo çimê şarê Şingalî de bido qebulkerdene. Wa çew hesabanê gemarinan nêkero. Ma do mîro ke bê îradeyê êzidîyan îlan bibo qebul nêkerê. Şarê Şingalî kamî sey mîrî qebul bikero, o do bibo mîr.”