Dêrsim de cinîyê ke hemverê tacîz û şîdetî vejênê yenê cezakerdene. Endama HDPyî PM û Platformê Cinîyan ê Dêrsimî Helîn Yagmu Ucî wina vat: “Cinî zere de mêrde ra teber de zî dewlete şîdet vînena, vera şikdarî şîdetî yenê cezakerdene.
Dêrsim de polîtîkayê şerê taybetî yenê kerdene, wextê ke serebûtê îstîsmarî, tacîz û tecawuz vejêno, mercîyê edlî qerarê nimiteyî gênê û serebûtî nimnenê. Walîtî zî bi amancê reaksîyonê şarî bipelçiqnê her tim çalakî û bernameyan qedexe kenê.
27ê teşrîna verêne 2020ine de Huseyîn Polat ke restorantêkê de sey westa xebityayîne, hemverê cinîyêke tacîz kerdibi. 15 endamê Platformê Cinîyan ê Dêrsimî ke waştî hemverê nê çalakîye kenê rastê 3 hezar û 150 TL cezaya pere amebî. Derheqê înan de bi sebebê, ‘qedexeyê çalakîye’ zî cipersayîş dabî destpêkerdene. Heto bîn ra zî wendekara unîversîteya Munzurî Gulîstan Doku hema nêameya vînayene. Reyna serebûtê 20ê Gulane de ame kerdene ke cinîyêke bi nameyê V.Y dinge de bî û hetê cendermeyan ra rastê tehdîd û şîdetî amebî zî rojeve de ya.
Endama HDP PM û Platformê Cinîyan ê Dêrsimî Helîn Yagmu Ucî derheqê serebûtê Dêrsimî qewimyayî de ercnayîş kerd.
Helîne dîyar kerd ke bajar de hemverê cinîyan polîtîkayê şerî yeno kerdene û netîceyê nê de tecawuz, tacîz, îstîsmar û vînîkerdiş yenê ciwîyayîş. Helîne nê çî vat: “Hemverê cinîyê ke wazenê têkoşîn bikerê zî ceza û astengî yenê kerdene. Cinî her ca de rastê şîdetî yenê. Zere de rastê şîdetê mêrdan teber de zî rastê şîdetê dewlete yenê. Hewl danê ke cinîyan bipelçiqnê. La pêwa her çî cinî têkoşînê xo berz bikerê û nê wareyî de îtîrazê xo dewam kenê.”
Helîne derheqê cezayê pere de zî wina vat: “27ê teşrîna verêne 2020 de hemverê tacîzê ke ma çalakî kerd, polîsan vera ma şîdet bi ca ard û semedê ma her yewe 3 hezar û 150 TL ceza birna. Ceza danê ma la şikdarê şîdetî pawenê. Pêwa pêro astengîyan ma çalakîya xo kerd û şikdar ma teşhîr kerd. Tena nê çalakîyî ney, çalakîyê semedê Gulîstan Doku zî yenê astengkerdene.”
Helîne dîyar kerd ke bi cezayê pereyî dewlete serê cinîyan de sermaye awan kena û vat: “Dewlete cinîyan kena feqîr, vêşan verdena. Serê cinîyan de sermaye awan kena. Pandemî kenê bahane û ma kenê binê tedayan. Pêwa her çî do nêeşkê ma têkoşînê ma ra bikerê. Ma do heta peynî semedê Gulîstan Doku û cinîyê bînan têkoşîn bikerê.” DÊRSIM
