Heyana zîhnîyetê şerê taybetî nêbedilîyo, rewşa aştî û demokrasî aver nêşina. Çimkî nê warî de samîmîyet çinî yo. Şaro kurd heyana nê samîmîyetî nêveyno, qet bawerî nêkeno. Eke hikûmatê AKP û MHP’yî de bi misqalek yew rewşa samîmîyetî bibîyêne, bi verên ra fekê xo yo jahrin bedilnayêne. La çi heyfo ke nê warî de yew averî nêasena. Şero taybet her wext demê awîqîyayîşî ra kay keno. Çimkî demê awîqîyayîşî ra kaykerdiş yew zexeleya pîle û xapênayîşî est a. Îqtîdar çi rê nê demê awîqîyayîşî ra kay keno û sebeb çi yo? Bi esil sebeb eşkera yo. Îqtîdar rewşa statûyê Rojawanî paweno. Heyana rewşa Rojawanî eşkera nêbo, îqtîdarê AKP û MHP’yî rengê xo dîyar nêkeno.
‘Tirkîyaya bêterore’
Ewta de Amerîqa zî dirîyîye kena. Amerîqa heyana rewşa Îranî çareser nêko, seba statûyê Rojawanî qerarê xo nêdana. Hewayê her wextî hem rewşa tirkan û hem zî kurdan pîya îdare kena. Dewleta tirke Stenbol de Dolmabaxçe de Colanî reyde pêveynayîş kerd. La çi pêveynayîş kerd û çi sozî dayî, çi sozî girotî dîyar nîyo. Dewleta tirke bi zanê xo yê jahrinî ra polîtîkaya qilêrine gurênena û sîyasetê psîkolojîyê şerê taybetî de israr kena. Her dem fekê xo yê jahrinî ra Tirkîyaya bêterore ra hewayê vîncî fekê xo de cawena û psîkolojîyê şerê taybetî gurênena.
Kurdî samîmîyet pawenê
Şaro kurd hînê nê psîkolojîyê şerê taybetî ra eciz bîyo û nê warî de zelalîye û samîmîyet paweno. Eke hetê îdarekaranê dewlete ra misqalek yew samîmîyet est o, ganî verê verkan yew game aver fîno. Hesaban ra nê rojan de paketê qanûnê înfazî ardêne meclîs. La nê paketî de çi est o û çi çinî yo, hema zî yew çîyo eşkera çinî yo. Heyetê DEM Partî nê rojan de MHP û AKP’yî reyde pêveynayîş viraşt. Nê pêveynayîşan de çi qalî bîyî û çi sozî dayî û nê warî de eşkerayî çinî ya. Çîyo ke yeno vatiş “Vanê ke nê pêveynayîşî rind vîyartî”. La şarê ma heyana ewro nê warî de yew rewşa rinde nêdîya. Çi rê nêdîya? Çimkî her pêveynayîşî de eynî qale yena vatiş, la pratîk de yew rewşe nêasena. Çîyo ke aseno, her wext heqaretê Tevgerê Azadîya Kurdan kenê. “Vanê ma teror qedênayo û ganî PKK çekanê xo bê şert û mercan teslîm bikero.” No vatiş, vatişê heqaretî yo û tahrîkî yo. Nê warî de qet hedê yewî nîyo ke, Têgêrayîşê Azadîya Kurdan ra heqaret bikero û şenik bifîno.
Paştîdayîşê kurdan
Nê warî de Rayberê Şarê Kurdî Abdullah Ocalanî 27ê sibate de deklarasyonêkî reyde vengdayîş da û nê vengdayîşî heme dinya ra veng û gulbangî dayî. Bi verên ra şarê kurdî vengdayîşê Rayberê xo esas girot û paştî daye. Hînê dimi ra PKK’yî vatişê Rayber Abdullah Ocalanî xo ra esas girot û paştî daye. Badê zî PKK’yî kongreya 12. viraşte û xo fesh kerd. La nê warî de dewlete bi gorê yew rewşa misqalekî ra yew game nêeşte û bi rewşa eksî ra psîkolojîyê rewşa şerê taybetî de israr kerd û hema zî israr kena.
Gamê neweyî
Nê warî de ganî îdarekarê dewlete rewşa xapênayîşî û demê awîqîyayîşî ra fek verado û gamanê neweyan bierzo. Huqûqê birayîye çi yo, ganî bîyaro ca. Nazî hînê sewbîna tewr sebrê kurdan nêmendo. Her roje teyareyê şerî wardenê û herêmanê Kurdîstanî bimbardiman kene. Zîndanan de hema zî hepsîyê nêweşî serbest veranêdîyayî û hepsîyê ke 30 serrî rakewtî, cezaya înan qedîyaya û serbest veranêdîyayî. No tewr rewşe zî yew rewşa samîmîyetî nîya. Hema zî estbîyayîşê kurdan nîno qebûl kerdiş. Ganî verê verkan dewlete nê kayê xo yê qirêjî ra fek verado û game bierzo. Hînê badê ganî qalê viraştişê qanûnê bingeyî bêro vatiş. Sewbîna tewr vatiş xapênayîş o û dem vîyartiş o.
