Serlêdanên ji bo 7’emîn Pêşbirka Helbestan a Arjen Arî ku ji bo bîranîna helbestvan Arjen Arî bê sazkirin dest pê kir

Serlêdanên ji bo 7’emîn Pêşbirka Helbestan a Arjen Arî ku ji bo bîranîna yek ji nûnerên Wêjeya Modern a Kurdî Helbestvan Arjen Arî bê sazkirin, dest pê kir. Pêşbirk ji aliyê malbata Arjen Arî û Weşanên Sor ve tê lidarxistin. Şertên pêşbirkê, ji aliyê malbata Arjen Arî û Weşanên Sor ve li Şaxa Hejmar 1 a Egitîm Senê ya Amedê bi daxuyaniyeke çapemeniyê hatin aşkerakirin. Nunerên Weşanên Sor Reşo Ronahî di daxuyaniyê de diyar kir ku pêşbirkê, bi armanca xwedî derketina li wêje û zimanê kurdî ku Arjen Arî kedeke mezin daye, li dar dixin.

Endamên juriya pêşbirkê ji Berken Bereh, Necla Arî (Xwişka Arjen Arî), Bêrîvan Zînzal, Fewzî Bîlge û Yeqîn H. pêk tê û serlêdanên pêşbirkê di navbera 26’ê mijdara 2019’an û 1’ê adara 2020’an de dê bên qebûlkirin.

Şertên pêşbirkê bi tevahî wiha ne:

• Xelat dê bo berhemên bi zaravayê kurmancî hatiye nivîsandin bê dayîn.

• Weke xelata pêşbirkê berhema ku bi ser bikeve dê ji hêla saziya ku vê pêşbirkê li dar dixe ve ji hêla Weşanên Sor ve bê çapkirin.

• Her kesê ku heta niha berhemeke wî/wê ya helbestê nehatibe çapkirin dikare serî lê bide.

• Malbata Arjen Arî û Weşanên Sor dê bi hev re kesekî/ê ku ji bo parastin û pêşvebirina ziman û edebiyata kurdî kar û xebat kiriye hilbijêrin û ‘xelata giramgiriyê/xelata rûmetê’ bidinê.

• Berhemên ji hêla saziyek ve hatibe xelatkirin an di pêşbirkekê de xelat wergirtibe nikare tev li pêşbirkê bibe.

• Berhemên ku tev li pêşbirkê bibin divê bi alfabeya latînî hatibin nivîsandin.

• Mafê lijneyê heye ku di dema çapkirinê de li ser berhema ku xelat wergirtiye guhertinan bike.

• Heke jurî tu dosyeyê hêjayî xelatê nebîne dikare xelat nede.

• Dosyeyên ku ji bo pêşbirkê bêne rêkirin divê di qabareya (hacm) pirtûkê de, 64 rûpel (4 form) bin.

• Dosye divê di formata A4 de, 5(pênc) nusxe û bi CD yek, USB yek ku dosye tê de ye bê rêkirin ango bi awayê maîlê bête şandin.

• Dosyeyên ku bi kompûterê nehatî dîzaynkirin û CD yek, USB yek pêve nekirî ango bi mailê nehatî şandin wê neyên nirxandin.

• Divê di dosyeyê de nav, nîşan an mexlas hwd. ku xwediyê berhemê bide nasîn tunebe.

• Helbestvanên ku beşdarî pêşbirkê bibin dê kurtejiyan, navnîşan û pêdiviyên bo têkiliyê di nav zerfeke devgirtî de rêbikin.

• Encama pêşbirkê dê di 15’ê Gulana 2020’an de, yanê roja cejna zimanê kurdî bê aşkerakirin û xelat jî dê sala bê di Fûara Pirtûkan a Amedê de bête dayîn.

• Divê dosye bi kargo yan bi posteyê, bo vê adresê bêne rêkirin: Yenîşehir Mah., Alî Emîrî 7. Sokak, No:22/7, Kat:1, Yenîşehir/Diyarbakir (li ser navê Buroya Amedê ya Rojnameya Evrenselê)

• Serlêdanên rû bi rû nayên qebûlkirin.

• Dosyeyên ku bo pêşbirkê bêne rêkirin li xwediyê wan nayên vegerandin.

• Endamên lijneya pêşbirka helbestê ya Arjen Arî, dê piştî encamê bizanin ka xwediyê berhemên ku dengê xwe dane wan kî ne.

• Kesên xwedî berheman divê di navbera 26’ê Mijdara 2019’an û 1’ê Adara 2020’an de dosyeyên xwe bişînin. AMED