Şima zî zanê ke 14ê hezîrana 2018î de parlementerê AKPyî Halîl Îbrahîm Yildizî semedê raywaştişî Pirsûs de keye û dikanî zîyaret kerdêne. Yildiz û ê ke boça ci dima gêrenê şinê dikana Şenyaşaran zî û keyeyî ra raye wazenê. Munaqeşeyan ra dima dikan de serebût qewimîyeno û Celal Şenyaşar û Adil Şenyaşar bi giranî, Mehmet, Fadil û Ferît Şenyaşarî zî bi hawayêkê şenikî birîndar benê. Emîne Şenyaşar û mêrdeyê xo Haci Esvet Şenyaşar şinê nêweşxane ke domananê xo bivînê. La verê çimanê Emîne Şenyaşare de mêrde û 2 lajê ci yenê qetilkerdene. Ma nê çîyî pêro çapemenîye ra eşnawitî. Ma bêrê mesela ser o.

Dayika Emîne sey pêroyê dayikanê bi zerrî şikiteyan nêeşkaye dejê mêrde û domananê xo, xo vîra bikera û 8ê adare de verê edlîyeya Pirsûsî de tewrê lajê xo Ferît Şenyaşarî çalakîya roniştişî ya ‘edaletî’ daye dest pêkerdene.

Dayika Emîne çiqas çimanê xo padena domanê ci yenê verê çimanê aye. Senî domanê xo ardî dinya, senî înan ra hes kerd, senî ê mird kerdî, senî dest bi mekteb kerdî, senî huyayê dayika xo rê, dayika xo senî heskerdêne, senî pîl bîyî û heta roja sîyaye ke domanê aye qaşo ‘sîyasetmedarê’ hetê çekdaran ra ameyî qetilkerdene. Nê heme çîyî sanîye bi sanîye verê çimanê ci de ganî benî û şenikîya domananê xo ra heta roja sîyaye her çî newe ra newe beno. Tu dayikêk mumkun nîyo ke domananê xo, xo vîra bikera. Nê çîyî ne vîrê to ra şonê dakiya Emîne û ne zî ti eşkena nê dejî rê dermanêk bivîna. Destê to de tena mendo edalet. Cezakerdişê qatilan beno ke awêk birijno zerrîya to.

Eke rewşa to biameyêne zanayene û dejê zerrîya to hetê qanûnê cezakerdişî û îdarekaranê dewlete ra biameyêne hîskerdene mumkun nîyo ke nê kesê çekdarinî teber de dest û linganê xo biteşênê û bigêrî. Kes xo nêkeno herinda to. Coka ra kerdoxî bi asanî teber de gêrenî. Înan senî semedê rayêk di rayan hende gonî rijnaye. Zerrîya dayik, cinî, way û birayan dejnaye. Xoverdayîş û waştişê edaletî ra vêşêr to dest de çîyêk nêmendo.

Dayika Emîne êdî qîrena û dejê zerrîya xo vera nalena. Her qîrayîşê xo de cezakerdiş û edalet wazena. Dayika Emîne vana ‘Çîyo ke hende mi dejneno qey şima qasê serê derzîne nêdejneno. Tena yew deqa xo bikerî herinda mi. Mi di doman û mêrdeyê xo vînî kerdî. Hem zî semedê yew di rayan. Ez kam cû rê biberma. Şima çîyêko winasî cuyayî? Nê. Şima nêzanê zerrîya mi de çi derdêko sîya û bêderman esto. Semedê hîskerdişê dejê zerrîya mi, ferzo ke şima zî nê derdan bivînê? Hende çî keraye ser o bêro kera teqena. Êdî ez nêeşkena paweyê edaletê mîyanê wirdî lewanê şima vindera. Eke edalet nêro ca ez do semedê caardişê edaletî çi mi dest ra bêro bikera û doza mêrde û domananê xo ra şêra.’