Pêngava “Ji Abdullah Ocalan re azadî” di asta navneteweyî de didome. Nûnerên rêxistinên siyasî ji gelek welatan peyama piştgiriyê didin pêngavê. Parlamenterên Partiya Çep a Serxwebûnê Eh Bildu ku yek ji partiyên girîng ên siyasî yên welatê Baskê ye, bi dîmen tevlî pêngava navneteweyî bûn. Parlamenterê EH Bildu Igor Zulaika bal kişand ser tecrîda giran a li ser Rêberê Gelê Kurd Abdullah Ocalan ku 44 meh in nikare malbat û parêzerên xwe bibîne û got, “Ev rewş li dijî mafên mirovan e. Dixwazim ji vê derê peyama xwe ya piştevaniyê ji wî re ragihînim. Ew qasidekî aştiyê ye. Weke partiyeke polîtîk em dixwazin ragihînin ku bi Ocalan û têkoşîna wî re ne. Û ew bi tenê nîne. Em piştgiriya wî dikin.”
Zulaika xwest Rêberê Gelê Kurd Abdullah Ocalan tavilê azad bibe û got, “Azadiya Abdullah Ocalan wê çareseriyê ji pirsgirêka Kurd re bîne. Ji ber têkoşîna we gelekî spasiya we dikim. Piştevaniya me wê dewam bike. Di serî de Abdullah Ocalan divê girtiyên siyasî hemû azad bibin. Em dibêjin, Azadî ji Ocalan re.”
Em dixwazin Abdullah Ocalan azad bibe
Yek ji aktorên girîng ên siyasî yên El Bildu parlamenter Oihana Etxebarrieta Legrand jî li ser medya dîjîtal peyamek weşand û got, “Weke EH Bildu em careke din dixwazin ku Abdullah Ocalan azad bibe. Li gel gelê Kurd em ê têkoşîna xwe dewam bikin. Em bi we re ne. Azadî ji Ocalan re.”
Senetor Diaz: Ji bo çareseriyê azadiya Abdullah Ocalan lazim e
Senatorê Baskî Gorka Elejabarrieta Diaz ê li Senatoya Spanyayê jî peyamek weşand. Gorka Diaz ku ji Partiya Bildu ye weke berdevkê partiya xwe li senatoyê pêşnûe pirsek pêşkêşî komîteya têkiliyên derve kir û ji hikumeta Spanyayê xwest, ku li hemberî vê girtîhiştina neheq helwestê nîşan bide.
Senator Diaz destnîşan kir ku mafên qanûnî yên Abdullah Ocalan bi rengekî cidî têne binpêkirin û got, “Konseya Mafên Mirovan a Ewropayê hikum da ku darizandin ne bêalî bû. Ji ber van hemûyan weke EH Bildu em careke din radigihînin ku bi Abdullah Ocalan û gelê Kurd re ne. Hem ji ber sedemên mirovî hem jî ji ber tevkariya li çareseriya siyasî ya pirsgirêka Kurd em dixwazin Abdullah Ocalan bê berdan.”
Senator Diaz peyama xwe bi dirûşma “Azadî ji Ocalan re û Bijî Kurdistan” bi dawî kir.
