Dîktator Erdogan seba ke îqtîdar de vindero her wesayîtêkî şuxilneno. Hetêk ra bajarê Rojawanî yenê bombardumankerdene, hetekê bînî ra sîyasetkarî têver têdim ra raştê tedayan û rexneyan manenê. Şaredarê Stenbolî Ekrem Îmamoglu rê cezaya 2 serran 7 aşman dîyaye.
Dîktatorî caran nêwazenê îqtîdarê xo ra fek vera bidê. Çike ê bêrayîrîye, bertîl û bêexlaqîye kenê. Rayberê înan dizdî ya. Seba ke muhakeme nêbê, îqtîdarê xo pawenê. Baxusus wextê weçînitişan de her kayî kay kenê. Destpêkê weçînitişî 13ê teşrîna peyêne de dîya. Hêzanê nimitkîyanê dewlete teqayîşêk serûber kerd. 6 merdimî ameyî qetilkerdene, nêzdî 80 merdimî dirbetin bîyî. Bombaeştoxe Alham Albashire tayê çîyî îtîraf kerdî. Aye vat ke birayê aye yo pîl mîyanê Artêşa Sûrîye ya Azade de fermandar bî. Oncîna Fermandarê QSDyî Mazlum Ebdîyî dîyar kerd ke 3 waye/birayê Albashire mîyanê DAÎŞî de mendê û seba cergan merdê. Goreyê nê zanayîşan Alham Albashire bi destê hukmatê Erdoganî ameye şuxilnayene.
Çîroka verg û verek/vereke
Rixmê hende delîlan hukmatê Erdoganî Îdareyo Xoser ê Rojawanî sucdar kerd. Na rewşe manena pê çîroka vergî û verek/vereke. Verek/vereke çêm de awe şimina/o. La cêrê vergî de şimina/o. Verg vano ke “ez to wena, çike ti awe lêşin kena/kenî.” Verek/vereke vana/o ke “la ez cêrê to de şimina, senîn lêşin bikerî/a.” Vergî vato “wa bibo, ez oncîna to wena.”
Aseyê Putînî û Alîyevî keno
Teqayîşê Taksîmî ra dima 19ê teşrîna peyêne de hukmatê Erdoganî Rojawanê Kurdistanî de dest pê bombardumanî kerd. Dewe û bajaran da domanî tede zaf merdimî ameyî qirkerdene. Hema zî hêriş dewam keno. Seba nê hêrişî hêzanê mîyanneteweyîyan ra zî hetkarîye girewte. Erdogan aseyê Putînî û Îlham Alîyevî keno. Xora mabênê ey bi înan “hemkarîye” esta. Senî Alîyevî Karabag de şer kerd, hiş û vîrê şarê Azerbaycanî avurna, Erdogan zî xêrê şerê Rojawanî wazeno vîrê şarê Tirkîya bibedilno. Çike Tirkîya de xizanîye û bêkarîye roje bi roje zêdîyenê. Krîzo ekonomîk vernîya Erdoganî de sey “vayê pruva” yo. O fikrîyeno ke têna şer û neteweperestî eşkenê ey bîyarê îqtîdar.
Dewaya Îmamoglu
Senaryoyê weçînitişî de serebûtêko peyên dewaya Ekrem Îmamoglu bî. Erdoganî texmîn kerdêne ke Îmamoglu vera ci do hembero gird bibo. Nê semedî ra ci rê “dewaya sîyasî” ameye akerdene.
Yeno îdîa kerdene ke Îmamoglu endamanê Heyetê Weçînitişî yê Berzî rê heqaret kerdo. Peynîya muhakemekerdişî de Îmamoglu rê cezaya 2 serran 7 aşman û 15 rojan dîyaye. Yew zî goreyê maddeya 53. ya Qanûnê Ceza yê Tirkî qedexeyo sîyasî dîya ci. Na dewa mojna ke hukmo tirk binê serdestîya seraya Erdoganî de yo û pê fermanê ey qerar dano. Welatê ke wayîrê hukmê winayênî yê yenê sey “Patagonya” pênaskerdene.
