Cinîya kurde Jîna Emînî (Mehsa) ya 22 serre 13ê êlula 2022yî de seba ke gijikê ci asayêne hetê ‘polîsanê exlaqî’ yê dewleta Îranî ra verê birayê xo de Tehran de amebî destbendkerdene û 16ê êlule de zî îşkenceyan ra dinyaya xo bedilnabî. Jîna Emînî 13yê êlule ra heta 16ê êlule 3 rojan koma de mende.
Birayê Jîna Emînîye, Kîarash Emînîyî qetilkerdişê waya xo ra dima wina vatbî: “Wexto ke ez verê qereqolî de paweyê waya xo bîya, polîsan pê gazê îsotî hêrişê ma kerd. Şewe her cinîya ke qereqolî ra vejîyayêne vatêne ‘yewe kişîyaye.’ Mi fotografê Jîna mojna înan û înan vat ke Jîna kişîyaya. Jîna verê qereqolî ra pê ambulansî wedarîyaye nêweşxane. Nêweşxaneyê Kasra de ame îdîakerdene ke Jîna de meseleya qelbî esta. La mi bi çimanê xo dî ke rî, ling û bedenê aye sîya bîbî.”
Bado ke hewldayîşê nimitişê sebebê qetilkerdişî veng vejîya, şahîdan û belgeyan de ame vatiş ke netîceya îşkenceyî de kewta koma.
Dinya de cinîya kurde
Qetilkerdişê Jîna ra dima reaksîyonêko gird vejîya teber û vera ney şorişêko pîl qewimîya. Hetê bînî ra nê qetilkerdişî mîyanê têgêrayîşanê azadîye yê cinîyan ê dinya de zî ruhê yewî û yewbînantepiştişî vet raşte. Serewedarnayîşî bi serkêşîya cinîyan dinya de veng da û her cayo ke tede şoriş estbî de siloganê ‘Jin, Jiyan, Azadî’ ame berzkerdene. Bi nê serewedarnayîş û rêxistinbîyayîşê cinîyan seserra 21î bîye seserra cinîyan. Cinîyan serewedarnayîş de rejîmê Îranî bêhêz kerd û armancê heme xayîn û îqtîdaran bin kewt. Êdî dinya cinîya kurde nas kerde û kurdan mojna ke yew çilayêk semedê şorişê sebê înan o.
Bi desan kesî kişîyayî
Roja çewresê Jîna de wexto ke şarî verê xo da goristanî, serewedarnayîşêko gird vejîya û bi desan kesî ameyî qetilkerdene. Nê çalakîyan de xeylê kesî hetê dewleta Îranî ra ameyî tepiştene û qetilkerdene. Bi wesîleya Roşanê Remezanî zî Mahabad de bi seyan kesan waşt ke şêrî zîyaretê goranê çalakîkeranê ke serewedarnayîşê Jin, Jiyan, Azadî de şehîd bîyî la ewja de zî şar bî hedef û netîceya hêrişan de bi desan kesî ameyî qetilkerdene.
Nazîla Maroofîane tepişîyaye
Vîşêrê qetilkerdiş û daliqnayîşê çalakîkeran, Nazîla Maroofîane seba ke babîyê Jîna Emînîye reyde roportaj kerd, amebî tepiştene. 2 rojnamegeranê cinîyan ê ke qetilkerdişê Jîna Emînîye vet raşte zî bi sûcê ajantîye hetê rejîmê Îranî ra ameyî muhakemekerdene.
