Riyad Selahaddînî ard ziwan ke PDKyî Hêzê Roje seba mudaxeleyê Şorişê Rojawanî awan kerdî û vat: “Nêzdîyê 6-7 serrî yo hêzê PDKyî bi temamî binê kontrolê MÎTî de yê.”
Riyad Selahaddîno ke Qamişlo ra yo, verî mîyanê artêşa tirke û hêzanê ‘Roje’ û hêzanê Zêrevanî yê PDKyî de fermandarîye kerde. Riyad Selahaddîn nika mîyanê QSDyî de xebitîyeno.
Selahaddînî ANFyî rê qala ci kerde ke PDKyî senî seba mudaxeleyê Rojawanî Hêzê Roje awan kerdî.
Riyad Selahaddînî îfade kerd ke PDKyî 2011 de Hêzê Roje awan kerdî û vat: “Binê sîwana Zêrevanî de, 2011 de bi nameyê ‘Leşkeranê Roje’ ma Tabûrê Xinisî awan kerdî. Dima taburê bînî ameyî awankerdene. Ez û Bedel Bendî ma îdarekarê alaya 1. bîyî û perwerdeyê înan zî hetê fermandaranê Zêrevanî ra ame dayene. Hêzê Zêrevanî zî 2003 de hetê Ezîz Weysîyî ra binê sîwana PDKyî ronîyabî. Ezîz Weysî keso vakurij bî û PKKyî ra remabî. 2012 de ma Mesûd Barzanîyî de pêvînayîş kerd. Barzanîyî ma rê vat ke o hîseyê xo ra meaş dano ma. Ma vat ke ma pere nêwazenê û nêwazenê partîyanê Rojawanî rê pabeste bibê. Ey zî soz da ma û vat ‘Şima do leşkerê Barzanîyî bibê.'”
Selahaddînî wina dewam kerd: “Wexto ke ma alaya 2. awan kerde, Rojawan de zî YPG ronîya. Serranê 2013-14an de hînî ENKS û PDK-Syî xo ma rê ferz kerd. Alaya 3. bi temamî endamanê ENKSî ra ameye pê. Barzanîyî soz dabî ma ke ma do partîyanê sîyasîyan rê pabeste mebê la sozê xo nêard ca. O çax perwerdeyan de tim seba PKKyî çîyê xirabî ameyêne vatene. Bi taybetî ENKSyî bi xirabî propagandaya Şorişê Rojawanî kerdêne.”
