Sekreterê Giştî yê Neteweyên Yekbûyî Antonio Guterres der barê şerê di navbera Hizbullah û Lubnanê de ji têlevîzyona amerikî CNN’ê re axivî.

Antonio Guterres da zanîn ku rageşiya di navbera Îsraîl û Hizbulahê de zêde bûye û êrîşa dawî ya ku Îsraîlê ya li ser Lubnanê jî mirovan dixe nava fikaran. Antonio diyarkir ku dibe Lubnan bibe Xezayek nû û got; “Bila Lubnan nebe Xezeyek nû.”

Antonio Guterres bang li Îsraîl û Hizbulahê kir ku rageşiyê kêm bikin û da zanîn ku her du alî jî nêzî agirbestê nabin, divê şer dawî bibe.

Israîlê jî hişyarî da xelkê Lubnanê

Ajansa fermî ya Lubnanê ragihand ku ji Îsraîlê bi şêniyên Beyrûtê, herêmên din ên Lubnanê û heta nivîsgeha wezîrê çapemeniyê re bi rêya telefonê hatiye axaftin û jê hatiye xwestin bi lez ji cihên xwe derkevin.

Ajansê diyar kir ku Îsraîl şerekî derûnî li dijî lubnaniyan dimeşîne. Nivîsgeha wezîrê çapemeniyê yê Lubnanê Ziyad Mekarî jî piştrast kir ku peyameke bi qeyd bi rêya telefonê jê re hatiye ku jê tê xwestin ji cihê xwe derkeve.

Artêşa Îsraîlê bang li şêniyên Lubnanê kiribû ku ji navendên Hizbullahê dûr bikevin.

Li başûrê Lubnanê şerekî dijwar di navbera artêşa Îsraîlê û Hizbullahê Lubnanê de rû dide. Artêşa Îsraîlê gelek bajarokên Bîqayê ya li rojhilatê Lubnanê û bajarokên din ên parêzgeha Nebetiye bombebaran kirin.