Endama Komeleya Jinan a Mîmozayê ya li Mêrsînê Şehrîban Şeker, di hevpeyvînekê de têkildarî Gulistan Doku û Rojîn Kabaîş axivîbû. Ji ber gotinên “Delîl hatine tunekirin, hewl didin weke întîharê nîşan bidin û bi ser cînayetên jinan tê girtin”, bi îdiaya “agahiyên xelet parve kiriye” doz lê hatibû vekirin. Danişîna doza Şehrîban Şeker li 15emîn Dadgeha Cezayên Giştî ya Mêrsînê hat lidarxistin. Şehrîban Şeker ku negirtî tê darizandin û parêzerên wê di danişînê de amade bûn. Endamên Tevgera Jinên Azad (TJA) û Komeleya Jinan a Mîmozayê danişîn şopandin.

Di danişînê de bersiva emniyetê ya ji bo muzekkereya bi daxwaza hêmayên sûc çêbûne yan na hate xwendin. Şehrîban Şeker di parastina xwe de got ku pirsîna aqûbeta jinan sûc nîne.

Dozger jî mutalaaya xwe pêşkeşî dadgehê kir. Di mutalaayê de hat gotin ku Şehrîban Şeker ji ber hevpeyvîna xwe poşman nîne û îdiaya ku dikare pergala cemaweriyê xera bike kir.

Şehrîban Şeker jî li dijî mutalaayê got: “Ez, parastina xwe ya berê dubare dikim. Min tu tiştekî bibe sûc nekiriye. Di rewşa heyî de du mirinên biguman hene. Piştî 5 salan li dosyaya Gulistan Dokuyê delîlên nû hatin zêdekirin.”

Parêzerên Şehrîban Şeker jî li dijî mutalaayê dem xwestin.

Dadgehê daxwaza parêzeran qebûl kir û danişîn taloqî 16ê çileyê kir.