Cenazeyê Evîn Goyî (Emîne Kara), Mîr Perwer û Abdurrahman Kizilî do 3ê çeleyî de bêrê raştkerdene. Dezgehanê kurdan ê Ewropa semedê tewrbîyayîşê merasîmî veng da.

Semedê nê hîrê şehîdan do 3ê çeleyê 2023î de merasîmê raştkerdişî bêro kerdene. TJK-E û KCDK-E bi eşkerayîya hempare semedê tewrbîyayîşê merasîmî veng da. Eşkerayîye de nê ameyî parekerdene:

“Faşîzmê AKP-MHPyî sendromo ke Zap de ciwîya kerd ke pê hêrişê çekanê kîmyewîyan ê vera gerîlayan, hêrişanê îşxalî yê vera Rojawan û Başûrê Kurdistanî û polîtîkayanê îşkenceyî yê sîstematîkî yê vera Rayber Apoyî, tira bixelîsîyo la rixmê nê heme hêrişan ser nêkewt. Dewleta tirke serra 2022yî pê binkewtişî qefilnaye. Seba ke qesasê nê binkewtişî bigêro, şerê xo yê vera kurdan serê Fransa ra wazena bikirişo Ewropa. Senî ke qirkerdişê verênî de Sakîne Cansiz, Fîdan Dogane û Leyla Şaylemez ameyî qetilkerdene, qirkerdişê diyînî de zî şexsê Evîne Goyî de têkoşînê azadîye yê cinîyan ê kurdan ame hedefgirewtene.

Ganî ma wayîrê şehîdanê xo vejîyê ke wa Fransa reyna pîya bi dewleta tirke kurdan mekerê babeta bazarîye. Bi nê waştişî ma 3ê çeleyê 2023yî de semedê hîrê şehîdanê xo Evîne Goyî, Mîr Perwer û Abdurrahman Kizilî do merasîmê yadkerdiş û raştkerdişî organîze bikerê. Ma veng danê heme şarê xo yê welatperwerî û dostanê xo ke tewrê nê merasîmî bibê.

Reyna do 7ê çeleyî de vera wird qirkerdişanê Parîsî mîtîng û rayraşîyayîş bêrê kerdene. Ma inkeyî ra veng danê dostan û şarê xo yê welatperwerî ke wa tewrê na çalakîye bibê.”