Avûkatanê Baroyê Wanî ra Cemal Demîrî bala asayîşê weçînayîşî ant û wina qisey kerd: “Eke rewşêka xirabe, bêusûle biqewimîya, ma do destkarîya huqûqî bikerê. Seba asayîşê sindoqan destê ma ra çi bêro ma do bikerê.”

Demîrî dîyar kerd ke babeta asayîşê weçînayîşan de komel hesas o û vat: “Rêxistina Hemkarî û Asayîşî ya Ewropa (OSCE) seba welatanê endaman pêşnîyazanê weçînayîşî ser o raporan amade kena. 2018 de zî pêşnîyazê xo pare kerdî ke nê pêşnîyazî seba weçînayîşanê 14ê gulane zî derbazdar ê. Krîterê ke weçînayîşan de ganî goreyê nînan bêrê kerdene tedeyîya weçînayîşî bêtesîr kerde. Tedeyîya weçînayîşî heyf ke rayîr nêdana çimdarîya hemwelatîyan û huqûqê mîyanneteweyî. Pêro weçînayîşan de no dîyeno.”

Demîrî vist vîrî ke Tirkîya de 20 serranê peyênan de derheqê asayîşê sindoqan de nîqaşî yenê kerdene û vat: “Mîyanê komelê sivîlî, medya, dormeyanê sîyasîyan de derheqê asayîşê weçînayîşanê 14ê gulane de qesawetî est ê. Hukmat bi eşkerayîyanê xo asayîşê weçînayîşan visneno mîyanê tehlukeyî. Heyet û serekê sindoqan asayîşî ra mesuldar ê. Eke kêmasîyêka asayîşî biba hînî serekî eşkenê agahîyan bidê cendirme û polîsan. Nêbo cendirme û polîsî nêeşkenê destkarîye bikerê. La eşkerayîya Wezîrê Karanê Zereyî qesawet viraşto. Ma sey huqûqnasan sindoqan de çimdarîye bikerê. Eke rewşêka xirabe, bêusûle biqewimîya, ma do destkarîya huqûqî bikerê. Seba asayîşê sindoqan destê ma ra çi bêro ma do bikerê.”