Dara tenya qom nêbena

Bena şîye verg û teyro rê

Bena çeper dagirker û dizdo rê

Labelê xo nêeşkena bisevekno

Peynîye de bena lozine de kolîyêk

Arîstoteles cikewtişê kitabê metafîzîkî de “her însan tebîyat ra wazeno bizano” vano. Labelê eke Arîstoteles ewro bicuwîyêne nîya nêvatêne, vatêne tayê însanî wazenê bizanê. Dunya ser de organîzmo prîmîtîv bîle têlewe de cuwîyeno, aqilê î yo pardar est o ke, eke têlewe de nêbî nêeşkeno cuya xo dewam bikero. Dare ke tenya bîye tenya ma vanîme dare, la eke darî ke têlewe de zaf bîyî benê bir, daristan. Dunya û kaînat de her çî ebê formê xo ra est o. Hem cîw hem formê fîzîkî est o hem kî şeklê cuya xo est o. Şeklê cuya zobîna heyvano pêro xo miqetkerdîş ser o awan beno. Însanî de zobîna beno, hem serê miqetkerdîş beno hem kî kultur, bawerîya dînî û îdolojî ser şeklê cuya xo awan beno. Naye ra gore to ke şeklê xo ra meydan de nêbîya to to nî ya, zobîna çî ya. Şarbîyayîş kî nîya ro, to ke ebê kulturê xo cuya xo ra meydan de nêbîya kes to ra nêvano şar.

Dewleta tirke her çî ebê xelet ra dana famkerdene, çunke î zanenê ke eke rastîye ra qisey bikerê dewleta xo ya ke ebê zurî ro ra arda pêser zagonê xo beno têser têbin ra. Helbet nî zurî o averberdene de bara ma şarê kurdî kî est a. Tayê zurê înan, ma kî zey rastîya xo qebul kenîme. Dewleta Osmanî kolonyalîstê ke Balkano û hetê erabo de dest pêkerd tepîya şîye, ma kurdo hetê tirko girewt, ma xo vîra kerd înan welatê ma destê ma ra girewto. Tirko va “yunan û ereb welatê ma îşxal kenê”. Rastîye nîya nî ya, înan çendaw çend serra welatê xo yo ke binê bandora Osmanî de destê Osmanî ra girewt, xo kerd azad. Ma kurdo se kerd? Welatê xo azadkerdîş serê nê fikîrîyayîşî leweyê dewlata tirke de ca girewt. Dewletê ke o waxt gird bîyî înan kî va ênî tirko ca nêverdanê, ma kî welatê îno kenîme çar parçe. Ereb, yunan welatê xo û herra xo pêyser girewtê, ma kurdî mendîme binê bandora tirk, ereb û farisî de. Çi heyf o ke kes no çim ra seyr nêkeno. Nika kî tirk û sîyasetmedarê ma qalê birayîne kenê. Sîyasetmedarê ma kî vanê “Çanaqale de ma pîya ceng kerdo.” Rastî ma pîya ceng kerd, la ma semedê xo ceng nêkerd, semedê tirkan ceng kerd. Dewleta tirke kurdî, bira birayî rê kerdo dişmen, ma qalê kamcî birayîne kenîme? No qisey waxtê Şorişê burjuwazî yê Fransizî de burjuwazî eşt o meydan, la na birayîna şaro nî ya, birayîna burjuwazî ya. Şar bira nêbeno, zaf zaf beno dost. Dostîye kî mavênê têdûştîye de bena. Feqiranê bêdewlete ra hîç benê dost yan kî bira? Mileto zordar û mileto bindest senên beno bira? Haştîye kî nîya ra, eke to xo nêkerd têdûştê dişmenî haştîye qe waxt rastî de nêbena. Belka ge-ge ceng nêbeno, haştîye nefermî de qisey bena, la na haştîye de dişmen rehet nêvindeno, fikrê to û quweta to sayê keno. Key to bêhêz dîya reyna hêrişê serê to keno. Ti no hal de eke vana ‘’birayîna şaro’’, ti xo cêr ra vînena. Kenan Evrenî key ke Amed de îşkence ra şorişgerê ma kiştî, no şaro ke şîma vanê “bira” se ra 90 rayê xo dayî Kenan Evrenî. Kam tîya de eşkeno qalê “birayîna şaro” bikero. Ma rê hewceya yewine ma şarê xo de bira bîyîme, ma ke xo de bîyîme bira zobîna bira ma rê zaruret çîn o.

Weçînitişo ke vêrd ra çepê tirko, CHP ne ma hurînda însanî de dîyîme ne kî sîyasetê ma naskerd, la sîyasetê ma reyna hetkarê CHP û çepê tirkî bî. Rastîya şarê xo eştê pê goşî. Tayê însanê ma herednayî, tayê însanê ma sîyasetê ma ra kerdî serd. Şarê ma na baş fam kerda, duştê dişmenê ma de sîyaseto nerm nêbeno, dişmen eşkera eşkera her roje to kişeno, to î ra nêvana dişmen. To ke dişmen ra nêvana dişmen, o vano ez nîno rê se kon bikerî î reyna mi ra nêvanê dişmen. Nika reyna weçînitiş bî nezdî, CHP û AKP xo şîrîn musnenê kurdo, TV û rojnameyanê xo de bi kurdî qisey kenê. Naye xo vîra mekerîme AKP û partîyê zey AKPyî ênê û şonê, la CHP kurdî rê dişmeno paydar o. CHP û dewleta tirke hata ke ravêrdîya xo eşkera eşkera qebul nêkerde û kurdo ra bibexşîye nêwaşte qisey înan pere nêkeno, pêro zey virende zurî ya. Humanîzmê kurdo bîyo belayê serê kurdo, dunya ser o kes heqa kesî nêdano semedê humanîzmê î şarî ra. Herkesî heqa xo ebê quwet ra zorî ra girewta. Şaro ke binê bandore de bî, senên beno humanîst? Şaro ke xo nêxelesneno senên zobîna kesî rê hetkar beno. Spartê sîyasetmedarê kurdî yewin çar hetê Kurdistanî de şarê ma pêro bîyaro pêser. Xo vîra meke! to ke xo ra hes nêkerd, to ke qiymet xo û şarê xo nêda, kes ne qiymet dano to ne kî hurmet musneno to.

Resîm: Naz Alî Awla/Hewlêr