Roniştoxanê Amedî ard ziwan ke maeşo asgarî yo newî asta vêşanîye û mîqtarê enflasyonî de yo û şar vêşan veradîyeno.

Mecît Turgayî ard ziwan ke o astengdarêko bêkar o û şar xemê çewî de nîyo. Turgayî vat: ‘”Hêverî ganî şer vindero, dadîyî nêbermê. Seba ney zî ganî Îmrali de pêvînayîşî bêrê kerdene. Eke pereyo ke şerî rê yeno xerckerdene zîret û perwerdeyî rê bêro dayene, krîzo ekonomîk zî do biqedo. Ganî cinîyî hîna zaf tewrê perwerde, ekonomî, sîyasetî û cuye bibê.”

Remzî Elçîyî vist vîrî ke ‘prosesê dîyalogan’ de rewşa ekonomî hol bîya û vat: “Dima ke şerî newe ra dest pêkerd ma ancî xizan bîyî. Reyna pêro pere şino şerî. Maeşo asgarî qîm nêkeno çunke enflasyon zêde yo. Keyeyêko ke di domanê ci est bê senî do bieşko bi maeşê asgarîyî debara xo bikero? Xeylêk kargehan de merdimî binê maeşê asgarîyî de û bêsîgorta xebitîyenê.”

Mehmet Çîftçîyî îfade kerd ke meseleya debarkerdişî meseleya tewr pîl a û vat: “Krîzê ekonomîkî ra ma nêeşkenê nefesî zî bigêrê. Ne karmendî ne zî karkerî eşkenê xo bidevirnê. Çew nêeşkeno keyeyêkî yan zî wesayîtêkî bihêrîno. Ciwanî welatî teriknenê.”

Burhan Îşlenî dîyar kerd ke o zewijnaye nîyo la rixmê ney zî nêeşkeno debara xo bikero. Îşlenî vat: “Nan bîyo 15 lîra. Ma senî biciwîyê? Tay merdimî est ê ke nêweşîyê ci yê kronîkî est ê û ganî tim dermanan biwerê. Gelo hayîya hukmatî bi vaya dermanan est a? Ê vanê ke ê misilman ê coka tay kesî naye ra ray danê îqtîdarî. La îqtîdar xizanîya şarî nêvîneno. Şar vêşan yeno verdayene.”