Hemşaredara Qoserî ya Mêrdînî Hamdîye Bîlek Turgaye ANFyî rê derheqê texrîbatanê qeyûman de ercnayîşî kerdî.

Turgaye ard ziwan ke qeza de meseleya tewr pîle arêdîyayîşê çopan o û teyna 14 personelê pakîye yê şaredarîye est bîyê. Hamdîye vat: “Ma hêverî 36 personelî îlaweyê warê pakîye kerdî. Ancî ma venga şarî dabî ke bi zerrîwazî tewrê xebatanê pakîye bibo. Şarî bi pozîtîfî cewab da vengdayîşê ma. Ma şaredarîye bi deynê 106 mîlyon lîra dewr girewte. Coka ma neçare yê ke her çî hesab bikerê. Dima ke peymanê tay personelan biqedê ma do peymananê neweyan virazê.”

Hamdîye dîyar kerd ke qeza de wextêkê dergî ra nata meseleya awe zî est a û vat: “Mîyanê hewteyêkî de xeta awe teqîyaye. Awa ma Awa Sipîye ra yena. Awa Sipîye mabênê Nisêbîn û Mîdyadî de ya û çimeyê pêro Mêrdînî ya. Weçînayîşan ra dima zî birîyayîşê ceyranî dest pêkerd. Şar qestî ra bê awe û bê ceyranî verdîyeno. Di dewranê peyênan de qeyûman qetî şarî rê xizmetêk nêkerdo. Şarê ma zaneno ke ma senî şaredarîye dewr girewte. Coka bi sebrî paweno. Bi destekê şarê xo ma do bi lezî meseleyanê qeza çareser bikerê.”