Serra 2016î de reya yewine qeyûm tayînê şaredarîyan ame kerdiş û di doneman pêser şaredarîyê HDPyî hetê îqtîdarî ra bi tayînkerdişê qeyûman ameyî xespkerdiş. Reya diyîne zî serra 2019î de qeyûm tayînê şaredarîyan bî. Weçînayîşê herêmî yo peyên 31ê adara 2024î de ame kerdiş û DEM Partî weçînayîşê peyênî de 76 şaredarîyî girewtî. La îqtîdarî verê weçînayîşî sînyalê qeyûman da û waşt ke weçînayîşê Wanî betal bikero. Tewr peynî zî hemşaredarê Colemêrgî Mehmet Siddik Akiş hetê îqtîdarê AKP-MHPyî ra wezîfe ra ame girewtene û herinda ci de qeyûm ame cakerdene. Bado ke hemşaredar Akiş ame destbendkerdene û herinda ci de qeyûm ame cakerdene sere de Colemêrg her hetî ra vera xespkerdişê îradeyê şarî çalakîyanê protestoyî dest pêkerd.

Derheqê babetanê texrîbatê qeyûman, plan û projeyanê Şaredarîya    Peyasî û xespkerdişê Şaredarîya Colemêrgî de Hemşaredarê Şaredarîya Peyasî ya Amedî Cengîz Dundaro ke xoverdayîşê Colemêrgî de ca gêno, qisey kerd.

Erdê ke aîdê şaredarî yê roşîyayî

Dundarî destpêkerdişê qiseykerdişê xo de bale ante rewşa talanî ya qeyûmî û vat: “Dimayê OHALî bi Qerarnameyê Hukmê Qanûnî (KHK) serra 2016î de qeyûmî ameyî tayînkerdiş. Cipersayîşê qeyûman hetê rayaumûmî û meclîsan ra baş nêame kerdiş. Ma zanayêne ke bi ameyîşê xo ma do raştê texrîbatan bêrê. Nekiriştbarê ke aîdê şaredarî yê erzîyabî verê rotiş û dîyabî binê kontrolê yewîna ke tu eleqeyê înan bi envanterî çinî yo. Erdê ke aîdê şaredarîye bi ercêkê zaf erzanî ameyî rotiş. Ma seba tepîyagirewtişê nê cayan dest bi xebata huqûqî kerd. Ma do seba tepîyagirewtişê nê cayan û seba tepîyagirewtişê heqa şarê xo çi destê ma ra bêro bikerî.

Reaksîyonê komelî

Dundarî dewamê qiseykerdişê xo de wina vat: “Hetê şarî ra caardişê qeyûman ê antîdemokratîkî vejîyayî raşte û dimayê krîzê ekonomîkî bi ameyîşê qeyûman zirarêko bîn zî dîya komelî ro. Bi eşkerayî mudaxaleyê heqa weçînayîş û ameyîşweçînitişî ame kerdiş û rejîm raştê reaksîyonê komelî ame. Şarê ma nê polîtîkayan rê cewabo tewr baş sindoqan de bi nîşandayîşê îradeyê xo da û sindoqan de peynîya rejîmî arde. Şarî 65 şaredarîyê xo ke serra 2019î de qeyûm tede ameyî cakerdiş tepîya girewtî û nîşan da ke sîstemê qeyûmî rijîyayo.”

Heta roja peyêne xizmet

Dundarî bale ante serê plan û projeyanê xo û xizmetanê ke wazenê bikerî û vat: “Seba erdlerzî projeyê ma yê muhîmê ke ma dest pêkerdo est ê. Etutê zemînî ra bigêrê heta îmalatî her beşî de kontrolê ma yenê kerdiş. Şaredarîya Pîle heme şaredarîyanê qezayan reyde xebatan rayîr ra bena. Ma dest bi xebata rayîrî kerd. Hedefê ma no yo ke ma demêkê kilmî de nê xebatan temam bikerî. Mudirîya Karanê Pakîye xebatan kena û bi Yewina Park û Baxçeyan xebatî yenê kerdiş. Ma hedef kenê ke bi hîrakerdişê erdê park û baxçeyan nefesêkê asanî hetê ekolojîye de bidî şarê xo. Hetê kultur û hunerî de, hetê perwerdeyî, aktîvîte û zîwanî de ma do falîyetan bikerî. Ma do ciwanan rê raşteyê sporî akerê. Ma do perwerdeyê asnawe û kişike bidî. Ma do giranî bidî falîyetê averşîyayîşî ser. Ma do seba cinîyan xebatan bikerê û raşteyê îstîhdamî înan rê virazî. Ma do hetê meslekî de kursan abikerî. Xizmetdayîşê şarî seba ma babeta yewine ya û ma do heta roja peyêne xebatanê xo bîyarê ca.”

Ganî wayîrvejîyayîş bibo

Dundarî tewr peynî qala xespkerdişê Şaredarîya Colemêrgî kerd û vat: “Bi xespkerdişê Şaredarîya Colemêrgî teberdeverdayîşê sîyasetê demokratîkî ame ciwîyayîş. Hem nêverdenê herême de şar xo rayîr ra bero û hem zî nêwazenê nasnameyo netewîyo ke yeno pelçiqnayîş sîstem de ca bigêro. Nê mesajan bi israr danê. Hewl yeno dayîş ke Peymana Lozanî bêro rojanekerdiş û bi tayînkerdişê qeyûman bifînîyo cuye. La pêro raştî hetê rayaumûmîye ra zanîyena. Ganî rayaumûmî nê prosesî baş biwano û analîz bikero û aye gore tewr nîşan bido. Ganî şexsê hemşaredaran de wayîrê komelî û sîyasetî bêrê wayîrvejîyayîş. Têna xoverdayîş ma xelisneno.”