Hîkayeyê merdimanê vînîbîyayeyan bi destê Mayanê Şemeyî arê dîyayî û şarê Stenbolî êdî eşkeno pê qodê QRyî nê hîkayeyan bimuso.
Mayanê Şemeyî kuçeyanê Stenbolî de serê dêsan ra broşurê bi nuşteyê ‘Se bîyo?’ pê qodê QRî daliqnayî. Şarê Stenbolî eşkeno nê qodanê QRyî pê telefonê xo bido wendene û xo biresnê hîkayeyanê kesanê vînîbîyayeyan.
Mayanê Şemeyî derheqê babete de hesabanê xo medyaya dîjîtale de dîmenêk weşana û vat: “Ma do tim aqîbetê merdimanê xo yê vînîbîyayeyan bipersê û edaletî biwazê. Sere de Meydanê Galatasarayî de şima eşkenê kuçeyanê Stenbolî de pê nê qodanê QRyî xo biresnê hîkayeyanê vînîbîyayeyanê ma.”
Qodanê QRyî de nika qala hîkayeyanê 27 kesan yena kerdene. Wina pawîyeno ke do hîkayeyê hîna zaf kesan bêrê parekerdene.
