Şarê kurd û erebî yê Kobanê paştî dano yewbînî û îfade kerd: ”Xêrê domananê ma QSDyî ra dewleta tirke do bin bikewa. Şarê kurdî dewaya heqî keno. ”

Tayê kurd û erebîyanê Kobanê derheqê hêrişanê bêmabênan ê dewleta tirke de ANFyî rê qisey kerd.

Roniştoxê kurdî yê Kobanê Sebrî Mehmûdî da zanayene ke dewleta tirke raşta raşte hêrişê sîyasetmedaranê herême kena û vat: “Dewleta tirke krîteranê şer û merdimîye nêşinasnena. Coka nê hêrişan de bara dewletanê mîyanneteweyîyan zî esta. Ganî ê sivîlan bipawê. Ganî dewletê mîyanneteweyî vera barbarîya dewleta tirke têbigêrê. Şarê kurdî dewaya heqî keno. Dewleta tirke armanc kena ke pêro kurdan qir bikera la xêrê domananê ma QSDyî ra dewleta tirke do bin bikewa.”

Roniştoxê erebî yê Kobanê Seqir Cizîrîyî derheqê hêrişanê dewleta tirke yê vera cinîyan û sîyasetmedaran de vat: “Ma sey şarê erebî heta peynî do xeta şehîdan de bibê û ma pê sereberz ê ke kênayê ma seba pawitişê erdê ma têkoşîn kenê. Têkoşînê ma yê azadîye do dewleta tirke bin bivisno. Dewleta tirke narey zî hêrişê sîyasetmedar û cinîyan ê têkoşeran kena. Ma sey şarê erebî nê hêrişan şermezar kenê û do heta peynî têkoşîn bikerê.”