Hemserekê KCDyî û Parlamenterê Partîya Çep a Keske Berdan Ozturkî dîyar kerd ke rixmê astengî û karanê bêusûlan şarê kurdî weçînayîşan de rayîro hîrêyîn weçîna û reyna cuyêka rûmetin, edîl, demokratîk û aştîyane waşte.

Ozturkî ard ziwan ke rayê Partîya Çep a Keske dizîyayê û ê îtîrazê ney kenê. Ozturkî da zanayene ke bêhuqûqîyêke nêmenda ke 8 serran de vera nînan ameya kerdene. Ozturkî vat: “8 serrî yo vera HDP, KCD, DBP operasyonî yenê kerdene. Dewaya qefilnayîşê HDPyî ra ma Partîya Çep a Keske ra tewrê weçînayîşî bîyî. Seba ke partîya ma reya verêne tewrê weçînayîşan bîya ma nêeşkayî heyetanê sindoqan wezîfedar bikerê la ma muşahîdê xo wezîfedar kerdê. La hema hema pêro sindoqan de bêusûlîyî ameyê kerdene û rayê ma MHPyî rê nusîyayê. Xora raporê bi îmzayanê hîtan û doneyê YSKyî yewbînan nêgênê. Bingeyê na dizdîye ameyo amadekerdene.”

Ozturkî îfade kerd ke wextê weçînayîşî de dewlete zaf astengîyî vetê vernîya înan û dîyar kerd ke tedayan ra ê neçare mendê ke mîtîngê Erxenî betal bikerê.

Ozturkî da zanayene ke şarê kurdî rixmê astengîyan zî nê weçînayîşan de bi hawayêkê zelalî tewirê xo mojnayo faşîstan, dişmenanê kurdan û rejîmê Erdoganî. Ozturkî vat: “Şarê kurdî vera a hişmendîya ke 8 serrî yo gonîye rijnena, werişto we. Rixmê astengî û karanê bêusûlan zî şarê kurdî weçînayîşan de rayîro hîrêyîn weçîna û reyna cuyêka rûmetin, edîl, demokratîk û aştîyane waşte.”