Hukmatê Erdoganî erdlerzanê Vakurê Kurdistanî de şarî qederê xo rê caver dano û bi hezaran kes binê xirban de xelisîyayîş paweno.
Sere de Mereş, Dîlok, Semsûr û Hatay de bi mîlyonan kesê ke herême de ciwîyenê senî ke qederê xo rê bêrê caverdayene. Nê cayan de xeylêk bînayê ke rijîyayî heme tede xebata cigêrayîş û xelisnayîşî dest pênêkerda. Şar pê îmkananê xo û paştdayîşî cehd keno ke derbanê xo bipeşo. Nêweşxaneyanê ke xesaro gird dîyo de malzemeyê weşîye û derman zî kêm bîyî. Yeno vatene ke amelîyatxaneyî nêeşkenê bêrê şuxulnayene û malzemeyê amelîyatan zî kêm bîyî. Herêmanê erdlerzî de malzemeyê semedê mudaxaleyî kêm ê û ambulansî zî peydakerdişê benzînî de tengayî ancenê.
Hatay
Qezayanê Îskenderun, Arsuz, Belen, Antakya, Defne, Samandag, Reyhanli û Kirikhanî yê Hatayî de bi seyan bînayî rijîyayî. Morganê di nêweşxaneyanê Îskenderunî de ca nêmendo, cenazayê ke binê rijnayîşî ra yenê vetene bi saetan wesayîtanê cenazayan de yenê pawitene. Şar bi îmkananê zî waranê venga de dormeyê adirî de şewe ravîyarneno. Îskenderun de kesanê ke xebata cigêrayîş û xelisnayîşî kenê vat, “Ekîpman, malzeme, xebatkaro zanaye çîn o. Ma binê nê rijnayîşan de têna meyîtan arêdanê.” Şewato ke badê erdlerzî embarê konteyneran ê teyaragehê Îskenderunî de dest pêkerd, dewam keno. Ekîbê AKUTî xebata xo ya verêne Nêweşxaneyê Dewlete yo ke rijîyayo de dest pê kerde.
Semsûr
Semsûr de hema xebata cigêrayîş û xelisnayîşî dest pênêkerda. Şar pê kepçayanê ke bi îmkananê xo peyda kerdî keno le bireso kesanê binê rijnayîşî. Ekîbê AFADî şewa sêşemeyî resayî bajarî la heme zî xeylêk rijnayîşan de xebate dest pênêkerda. Bajar de xeylêk taxan de ceyran çîn o û operatorê înternetî zî nêxebitîyenî. Projektorê ke semedê cigêrayîşî hewce kenê, çîn ê. Qezaya Sergolan de hema newe ekîbêk cayê rijnayîşê giranî de dest pê xebate kerd. Sergolan de rewşe çend şina giranêr bena. Kuçe û rayîrê bajarî qelişîyayî. Heme bînayanê bajarî de xesar est o. Erdlerzê ke peyra bîyî de bi desan banî rijîyayî. Şar pê xeyman a zî teber de dormeyê adirî de maneno.
Mereş
Mereş de zî rewşe cîya nîya. Pazarcixo ke merkezê erdlerzî yo de binê rijnayîşan de hema xebata cigêrayîş û xelisnayîşî dewam kena. Cenazayê ke di rojî yo korîdoranê nêweşxaneyî de yenê pawitene dîyenê keyeyanê înan. Yeno vatene ke xeylêk cenazayê bînî ameyî ardene nêweşxane.
Amed
Amed de de bînaya Işikî ya ke 18 cenazayê tira ameyî vetene de yeno texmînkerdene ke hema 28 kesî binê rijnayîşî de yê. Xebata hesase ameye caverdayene, cigêrayîş û xelisnayîşî pê makînayanê karî yenê kerdene. Yenîşehîr de zî yeno vatene ke binê xirba Merkezê Karî yê Dîyar Galerîa de 78 kesî estê, xebate yena domnayene.
Dîlok
Dîlok de şarî semedê resayîşê merdimanê xo şewe serê xirban de ravîyarnaye, AFADî badê 17 saetan dest pê karî kerd. Dîlok de 533 awanî rijîyayî, tewr tay 200 kesan dinyaya xo bedilnaye. Xesaro tewr gird qezayanê Îslahiye û Nurdagî de est o. Taxa Încirlî ya qezaya Şehitkamilî de yew bîna ya ke 50 kesî binê ci de yê ra vizêr serê sibayî panc kesî tira ameyî vetene la hema nêresîyayo ê bînan.
