Şarê kurdî bi hawayêkê girseyî waranê Newroze de cayê xo girewt û reyna seba azadîye veng da. Xeylêk bajaranê Bakurê Kurdistanî û Tirkîya de îradeyê aştîye û xoserîye peyda bî. Hukmato tirk vera nê îradeyî neçar mend.
Emser zanîyeno ke Kurdistan de di erdlerzê girdî qewimîyayî. Erdlerzê Mereşî xeylê xemgînkerdox bîyî. Şaro kurd o ke binê zulmê dewleta tirke de ciwîyeno nê erdlerzan de zî bêwayîr mend. Ci rê hetkarîye wextê xo de nêamebî. Bi hezaran kesan dinyaya xo bedilnaye. Nê semedî ra bimbarekkerdişanê Newroze de şayîye çin bîye. La waştişê azadîye estbî. Çimanê doman, kokim û cinîyan de ruhê paştîdayîşî estbî. Çarçewa weçînayîş û bedilyayîşî de hêvîyêka girde estbî.
Şarî peygoşîye nêkerde
Bêguman Newroza Amedî her serre bala kurdan û dormeyanê demokratîkan anjena. Her cayê Kurdistan û Tirkîya ra tewrbîyayîş beno. Goreyê serra verêne emser eleqedarbîyayîş tenê kêm bî. Wina aseno ke erdlerzî tesîr kerdo. Şar hema dejê bêtere anjeno û xemgînîya xorîne de yo. Baxusus hetê psîkolojî ra probleman ciwîyeno. Hema zî peyerdlerzî qewimîyenê û bînayî lerzenê. La şarî rixmê her negatîfîyan derheqê Newroze de peygoşîye nêkerde.
Rayber Abdullah Ocalan
Na Newroze de mîyanê şarî de vera Rayberê Şarê Kurdî Abdullah Ocalanî eleqeyo taybet estbî. Bitaybetî ciwanan portreyê Ocalanî kiriştêne û seba azadîya ey venga dewleta tirke kerdêne. Înan qêrayêne ke semedê çareserîya persa kurde muxatabêk Rayber Abdullah Ocalan o. Her bajar de no îrade eşkera bî. Êdî şaro kurd wazeno ke persa kurde bi mabênkarîya Îmraliyî bêra çareserkerdene. Şar êdî wazeno ke serê erdê xo de azad biciwîyo; aştîye, aramîye û xoserîye awan bikero. Şaro kurd baş zano ke eke azadîye çin a, xelisîyayîşê kultur, nasname û ziwanî zî çin o.
Resimê Kemal Kurkutî
Newroza Amedî de şarî reyna nameyê Kemal Kurkutî ard vîrî. Xora rasteyê bimbarekkerdişî de resimê Kurkutî amebî kiriştene. Têkoşîn û zerreraciheskerdişê Kurkutî zerrîya şarê kurdî de wayîrê cayêkê erjayeyî yo. Zanîyeno ke Kurkut 21ê adara 2017î de wareyê Newroze de bi destê polîsanê tirkan ame qetilkerdene. Gama ke polîsî pana Kurkutî ser, muxabîrê Ajansê Xeberanê Dîcleyî (DÎHA) rojnameger Abdurrahman Gokî fotografî antî. Nê fotografan rîyê dewleta tirke yo rast peyda kerd. Heta ke fotografî eşkera nêbîyî, kiştoxan qetilkerdiş înkar kerd. Tewr zîyade Walîtîya Amedî paştî daye kiştoxan. Yew zî hukmê tirkî vera rojnameger Abdurrahman Gokî dewa akerde.
Kurkut Meletî de amebî dinya û Unîversîteya Înonu de wendêne.
Jîna Mahsa Amînî
Rasteyê Newroze de resimê Jîna Mahsa Amînî zî bale antêne. Cinîyan, camêrdan û domanan verê resimê aye de bi rêzdarî fotografî antêne. Nameyê aye Rojhelatê Kurdistanî û Îran de sembolê xoverdayîşî bî. Zanîyeno ke Jîna Amînî 16ê êlula 2022î de hetê polîsê Îranî ra amebî qetilkerdene. Nê qetlîyamî ra tepîya Îran û Rojhelatê Kurdistanî de vera rejîmê mollayan xoverdayîşê tesîrdarî dest pê kerd. Hema zî ruhê xoverdayîşî xeylêk şaristanan de gandar o. Newroza Amedî de xoverdayîş reyna ame silamkerdene.
