Hemsereka HDPyî Pervîn Buldane dîyar kerd ke weçînitiş seba HDPyî zaf muhîm o û wina vat: “Şarê Tirkîya nê weçînitişî de do seba ameyoxê xo raye bidê. Ciwanî û cinîyî do seba ameyoxê xo raye bidê.”

Buldane bala girîngîya weçînitişî ante û wina qisey kerd: “No weçînitiş seba HDPyî zî muhîm o. Çike HDP xeylê wext o, bitaybetî weçînitişanê 2015î ra nat binê teda de yo û raştê şîdetêkê girdî yeno. Demêko ke weçîniteyî wezîfe ra ameyî girewtene, tayê erşawîyayî zîndanan, dewaya qefilnayîşî yê HDPyî rojdem de ya, dewaya tezgahî ya Kobanê rojdem de ya weçînitişo tarîxî do bibo.”

Buldane qiseykerdişê xo rê wina dewam kerd: “Ma sey HDP nê weçînitişan rê girîngîyêka girde danê û înan sey xelasê şaranê Tirkîya vînenê. Şarê Tirkîya nê weçînitişî de do seba ameyoxê xo raye bidê. Ciwanî û cinîyî do seba ameyoxê xo raye bidê. Na mesela têna meselaya weçînitişê serekwezîrî yan parlamento de dekewtişê parlamenteran nîya. Pêro dînamîkê komelkî û muxalefet do nê weçînitişî de ameyoxê xo dîyar bikerê. Coka ma vanê no proses prosesêko tarîxî yo. ”