Di 5’ê hezîranê de dema konvoya pêşmergeyên PDK’ê ber bi herêma Metînayê ve diçû li dijî wê teqîneke mezin pêk hat. Di teqînê de 5 pêşmergeyan jiyana xwe ji dest da û 4 jî birîndar bûn. Li ser vê yekê Şandeyeke ku ji parlamenterên Parlementoya Iraqê û Herêma Federal a Kurdistanê pêk tê hat avakirin. Şande wê li heremê lêkolînan bike.

Li gorî nûçeya ku der barê mijarê de di Rojnews’ê de cih digire; wê şande biçe seredana herema Metînayê. Parlamenterê Goranê Şaxewan Reuf ku di şandeyê de cih digire têkildarî mijarê ev agahî dane: “Şande nûnertiya Parlamentoya Iraq û Herêma Kurdistanê dike. Di şandeyê de nûnerên fraksiyonan û lijneyên peywendîdar yên herêmê jî hene. Em ê îro biçin Zaxo, Şeraniş, Batûfa û sibe jî biçin herêma Amêdiyê. Em dixwazin cihên bûyerên dawî lê qewimîne bibînin, bi taybet jî bûyera şehîdbûna pêşmergeyan. Piştî serdana me temam bû, em ê raporek hevbeş, li ser encamên seredana xwe amade bikin.”

Ji aliyê din KCK’ê têkildarî têqînê bang kiribû ku şandeyeke serbixwe û bêalî biçe heremê lêkolînan bike.