Semedo ke lîg eno hefte dest pê keno, ma eno hefte serê futbolî de vinderê. Helbet meseleyê ma, tîma ma Amedspor a.
Tirkiya de lîga tewr pîle Super Lîg a, dima ra Lîga 1., Lîga 2. û Lîga 3. yena. Peyê înan ra zî lîgê amatorî yenê. Amedspor di Lîga 2. Koma Sipîye de kay keno. Maço yewino ey ena serre 27ê tebaxe de yeno kaykerdiş. Wexto eno nuşte ame nuştiş hema maç kay nêkerdbî û wexto ke rojname bireso verê destê şima bizanê ke maço yewin qedîyayo zî. Ma enka ra tîma xwu rê serkewtiş biwazê û henî detayan binuşê.
Amedspor di binê rêveberî serekê kilube Selahattîn Yildirim û antrenor Ahmet Yildirimî de bi parolaya şampîyonîye dest pê lîge kena. Eno çend serrî yo rojeva Amedsporî û hezkerdoxanê Amedsporî şampîyonî ya. Par Play-Off de şikiyayî û nêeşkayî biresê mirazê xwu. Emsar reyna parola şampîyonî ya. Koma Sipîye de bi Amedsporî 19 tîmî estê. Par Pendîkspor bi 77 puanan bî şampîyon. Qeybî ke Amedspor bibo şampîyon ganî maçanê xwu de bi ser bikewo. 18 maçî estê û bi enîyan keno 54 puanî. Û wexto beşko henî maçanê teberî de jî bi ser bikewo, go bireso mirazê xwu. Heme Amedspor û hezkerdoxê ey hîveyê ena yewîye yê.
Êyê ke şîyî û ameyî
Qeybî tîme xurt biba, emsar çend transferî ameyî kerdiş. Amedsporî di stoperî Gokhan Keseoglu û Emre Can Coşkun, çend kaykerdoxê hetê rastî Rasît Yondem, Metîn Guler, Emrullah Ertuş girowtî. Qeybî hetê perê çepî Serdar Eylîk û Okan Denîz, qeybî hûmara 10. jî Omer Bozan girowt. Reyna qeybî santraforî jî di kaykerdoxî girowtî: Tayyîp Kanarya û Mehmet Ozturk. Kaykerdoxanê ke emsar girowtî ra oyo ke pîyaseyê ci tewr vay o Taner Gumuş Kayserîspor ra ame girowtene. Qîymetê ey enka pîyase de dewrê 150 hezarî euro wo.
Tayê kaykerdoxî zî şîyî. Mesela Muhsîn Îstemî û Mervan Çelîk. Mixabin enî wirdî şîyî, la eke nêşîyêne ga tewr baş bîyayêne, axir dinya ana wa.
Baro pîl serê milê kaykerdoxan û teknîkê înan de wo. Bê teknîk çî nêbeno helbet la hêvî esta ke antrenor kayêkê serkewteyî bimojno ma. Û baro ke keweno serê milê hezkerdoxanê Amedsporî zî esto. Mesela her hefte bi hezaran şorê ro maçan, temaşe bikerê û paştî bidê înan. Mesela enka bîletê kombîneyî yenê rotiş, bîletanê kombîneyan bigêrê.
Reyna, eno hefte tîme formayê xwu yê neweyî yê emsarî kerdî hedre. 4 formayî estê: formaya bi xêzanê zey çiwan, formaya sipîye, formaya sûre û formaya sîyaye. Heme tîman de girowtişê formayan karêko baş o qeybî tîman. Mesela tîmanê pîlan ê Tirkîya de bi se hezaran hebî formayî yenê rotiş. Qeybî Amedsporî zî temaşekerdoxî çiqa forma bigêrê hende qeybî tîme beno baş.
Heyecan
Û heyecan dest pê keno. Futbol heyecan o. Û wexto ke tîma bajarî biba û wexto ke îdîayê ci yê şampîyonîye bibo tewr heyecan beno zêde. Wa Amedspor emsar heyecanêkê başî bimojno ma û peynî de jî kupaya şampîyonî bîyaro Amed. Çira nêbo? Heme çî mimkûn o.
