Rêberê Gelê Kurd Abdullah Ocalan û girtiyên li Girtîgeha Tîpa F a Ewlehiya Bilind a Îmraliyê Omer Hayrî Konar, Hamîlî Yildirim û Veysî Aktaş di çarçoveya betlaneya Cejna Remezanê de di 31ê Adarê de bi xizmên xwe re hevdîtin kirin. Biraziyê Abdullah Ocalan Omer Ocalan û birayê wî Mehmet Ocalan, birayê Konar Alî Konar, birayê Yildirim Polat Yildirim û xwişka Aktaş Sabîha Aslan çûn hevdîtinê.
Aktaş ji Adara 2015an û vir ve ku sewqî Îmraliyê hatiye kirin tenê 4 caran hevdîtin bi malbatê re pêk aniye. Aktaş ji roja ku ew birine Îmraliyê heta niha carekê jî bi parêzerê xwe re hevdîtin nekiriye.
Aktaş ji dema ew birin Îmraliyê tenê di 5ê Hezîran û 12ê Tebaxa 2019an û 3yê Adara 2020an de bi malbata xwe re hevdîtin pêk aniye. Herî dawî Aktaş bi xwişka xwe Sabîha Aslan re li Serdozgeriya Komarê ya Amedê bi rêya telefonê axivîbû û di 27ê Nîsana 2020an de hevdîtin pêk anîbû.
Xwişka Veysî Aktaş Sabîha Aslan têkildarî hevdîtina 6 sal şûnde li Îmraliyê pêk anî ji Ajansa Mezopotamya (MA) re axivî.
Sabîha Aslanê anî ziman ku dema serlêdana Cejna Remezanê kirine ew zêde bi hêvî nebûye û got: “Min digot wê nebe, lewma ne pir bi hêvî bûm. Wekî her cara me serlêdan dikir, me got wê vê carê jî red bikin. Du roj beriya cejnê telefon kirin û ji min re gotin ku destûra serdanê hatiye dayîn. Ji kelecanê heta duh jî ez nikarîbûm razêm. 2 saetan xew bi çavê min neketiye. Mirov nikare behsa wê heyecanê bike. Ez dikarim bêjim 5 rojan 2 saet xew bi çavê min neketibû.”
Sabîha Aslanê diyar kir ku herî dawî birayê xwe 6 sal berê dîtiye û got: “Di navbera 6 sal berê û niha de ferqeke mezin hebû.” Sabîha Aslanê anî ziman ku li gorî berê bi muameleyeke baştir re rû bi rû mane. Sabîha Aslanê da zanîn ku hevdîtin 50-55 deqeyan dom kiriye û got ku wan bi Rêberê Gelê Kurd Abdullah Ocalan re li odeya ku girtiyan hevdîtin pêk aniye. Sabîha Aslanê bi bîr xist ku beriya niha li heman odeyê hevdîtin pêk anîne û wiha got: “Pêşî Mehmet Ocalan û Omer Ocalan hevdîtin pêk anîn. Piştre Polat Yildirim bi Hamîlî Yildirim re hevdîtin kir. Piştre jî me hevdîtinek pêk anî. Odeya ku min lê hevdîtin kir odeya ku maseya gilover lê bû.”
Sabîha Aslanê bilêv kir ku dema ketiye girtîgehê ji heyecana her du destên xwe daniye ser hev û li bendê sekiniye û got: “Ez hewl didim xwe kontrol bikim. Di wê kêliyê de memûr got, Veysî tê. Min li rûyê wî nêrî, berî ew ber bi min ve bê, ez ber bî ve beziyam û min ew hembêz kir û maç kir. Min got, Ez qurbana birê xwe bim. Ez qurbana hevalê te bim. Paşê em li dora maseyê rûniştin û me sohbet kir. Min zoq lê dinihêrî, min li rewşa hevalan jî pirsî. Min got Hûn çawa ne? Got, Em baş in, ew jî baş in. Di wêne de xurt xuya dikirin, lê ne wiha bû. Zihîf bû. Min li rewşa tenduristiya wî pirsî. Got, Tenduristiya me pir baş e.”
Sabîha Aslan ku got “Gava em li giravê bûn, min kulîlkeke zer a li derve birîbû û xistobû şûşeya pet, min xistibû hundir” got: “Min ew danîbû ser masey. Pirsî Te ev kulîlk ji ku aniye? Min jî got min ew ji vir aniye. Bi ken got, Çima tu ya li vir ji min re tînî; jixwe ez li vir im. Ya li vir bibe mal. Em keniyan.”
Sabîha Aktaşê bi lêv kir ku birayê wê rewşa malbatê pirsiye û wê jî gotiye ku her kes baş e.
Sabîha Aslanê diyar kir ku ne Aktaş ne jî ew nikaribûne rewşa bavê xwe yê ku di 30yê Mijdara 2022yan de jiyana xwe ji dest da bipirsin. Sabiha Aslanê wiha dewam kir: “Ne wî karîbû bipirse û ne jî min tiştek got. Piştre min ji Veysî pirsî Te tiştek bihîstiye? Li dîwêr nêrî û got, Mirina bavê min? û dû re wiha li axavtina xwe zêde kir: Belê min bihîst. Sedema mirina wî pirsî, min jê re got ku xwîn çûye ser mejiyê wî. Li halê dêya min pirsî. MIn jî got, extiyar bûye. Min got bi meraq li benda te ye. Wî jî got, Înşele.”
Sabîha Aslanê diyar kir ku wê behsa coşa Newroza li Amedê jî kiriye û wiha got: “Min ji Veysî re got Di Newroza Amedê de wêneyê we vekiribûn. Got ku hindik be jî dîtine. Min got di Newrozê de mirov bi heycana aştiyê bûn. Veysî got, Înşele. Min behsa dema xwendina bangê kir. Min got, ji extiyaran heta ciwanan her kes hestiyar bûye. Pirsî Wa? Gelek tişt hebûn, ji kelecana min nepirsî.”
Sabîha Aslanê diyar kir ku ji ber hinceta kincên bi etîket dişîne Aktaş xwe aciz kiriye û got: “Min jê re got ku cilên bi marqe neşandiye, tenê nivîs li ser hebûne. Min got ku her tiştên li ser wan nivîs hene ne marqe ne. Veysî ji min re got, Ez dixwazim ku tu cil û bergên li bazarê bikirî. Min jê re got ku ez nikarim wan bibînim, wî xwest ku tiştên wiha neşînin.”
Sabîha Aslanê li ser pirsa gelo name ji we re hatiye yan na, diyar kir ku Aktaş gotiye ku di nava 9 salan de tenê 3 name hatine.
Sabîha Aslanê diyar kir ku rewşa wan û moralê wan baş bûye û wiha got: “Moralê wî gelekî baş bû. Got moralê hevalên din jî baş bûye.”
Sabîha Aslanê ragihand ku xwestine malbat di çarçoveya Cejna Remezanê de slavê bidin girtiyan, lê ev daxwaza wan nehatiye qbeûlkirin.
