Rojhelatê Kurdistanî de seba paştdayîşê şarî grevo pêroyî ame kerdene.

Vengdayîşê PJAKî û partîyanê bînan ser o seba paştdayîşê şarî û çalakîkeran Rojhelatê Kurdistanî û Îran de grevê pêroyî dest pê kerd.

Xeylêk şaristanan de dikandaran dikanê xo qefilnayî. Dîmenanê medyaya dîjîtale de aseno ke beşdarîya seba grevî zaf a.

Bi taybetî şaristananê Sine, Kirmaşan, Ûrmiye, Bane, Merîwan, Mahabad, Seqiz, Dîwandere, Rewanser, Bûkan, Nexede, Ciwanro, Kamîran, Qurwe, Pîranşar, Serpêlî Zehwa, Şînoyî yê Rojhelatê Kurdistanî de şar û esnafî bi xurtî tewrê grevê pêroyî bîyî.

Xeylêk şaristananê Îranî de zî rewşe heman hewa ya. Şaristanê Meşhedî de dikandaran dikanê xo qefilnayî û paştî daye çalakîkeran.

Hewteyê vîyarteyî de Rojhelat de tewr tay 50 kesî çalakîyan de hetê hêzanê Îranî ra ameyî qetilkerdene.

Goreyê Rêxistina Heqanê Merdiman a Îranî destpêkê çalakîyan ra nata temamîya welatî de tewr tay 416 kesî ameyê qetilkerdene ke 51ê înan doman ê.

Çimeyanê muxalîfan zî pare kerd ke 640 kesî ameyê qetilkerdene.