Vervatoxa Meclîsê Cinîyan ê HEDEPî Halîde Turkoglu îfade kerd ke sîstemê Îmraliyî israrê şerî yo û wina vat: “Konferansê ma do azadîya Birêz Ocalanî bikerê rojdemê xo.”

Turkoglu ard ziwan ke înan qetî xoverdayîş û xebatanê xo yê înşakerdişî ra fek vera nêdayo û wina vat: “Ma 20 serran ra nata tecrubeyanê îdareyanê herêmîyan pêser kenê û bi nê tecrubeyan modelêk viraşt. No model ewro Rojawan û Şingal de gandar o. Vakur de zî ma kenê ke nê modelî cabikerê, coka qeyûmî tayînê şaredarîyanê ma benê. Sîstemê qeyûmî hînî bîyo sîstemêkê rejîmî. Nê rejîmî reyde qirkerdiş û şîdetê vera cinîyan zî zêdîyayî. Rejîmê qeyûman keno ke cinîyan têkoşînê azadîye ra dûrî bigêro. Bi nê rejîmê sîstemê hemserekîye û xîretê cûya têdûşte zî ameyî hedefkerdene. Hemserek û hemşaredarê ma yê cinîyî erşawîyayî zîndanan. La se beno wa bibo ma do tim sîstemê xo bipawê.

Xeylêk embazê ma zî Dewaya Dafike ya Kobanê de yenê muhakemekerdene. Îqtîdar bi na dewa qesasê DAIŞî gêno. Embazê ma yê cinîyî na dewa de tim bi îfadeyanê xo eşkera kenê ke na dewa komployê serdestîya camêrdan a. Kobanê bin nêkewte la na dewa netîceya têkoşînê embazanê ma de do bin bikewa.”

Turkoglu derheqê tecrîdî de wina qisey kerd: “Sîstemê Îmraliyî israrê şerî yo. Ma sey cinîyan do vera rejîmê qeyûman û tecrîdî tim têkoşîn bikerê ke nê wird sîstemî yewbînan ra cîya nîyê. Konferansê ma do azadîya Birêz Ocalanî bikerê rojdemê xo.”