Hêrişê dewleta tirke û hemkarîya PDKyî xeylêk cayanê Rojawanê Kurdîstanî de ameyî şermezarkerdene.
Vera hêrişanê îşxalî yê dewleta tirke û vera ambargoyê taxanê Eşrefîyê û Şêxmeqsûdî nêrazîbîyayîşî dewam kenê.
Şehba de bi hezaran Efrinîjî vejîyayî waran û hêrişê îşxalî yê dewleta tirke yê vera Kurdîstanî û PDKyo ke paştî dano hêrişan protesto kerd.
Heleb de zî şar vejîya kuçeyan û hêrişê îşxalî yê dewleta tirke şermezar kerd.
Meclîsê Keyeyanê Şehîdan ê Reqa û Federasyonê Gazîyan ê Reqa bi beşdarîya hemwelatîyan merkezê şaristanî de eşkerayîyêke daye. Eşkerayîye de ame vatene ke hêrişê îşxalî û mabênê Rojawan û Şingalî de xîretê viraştişê dêsan do îradeyê şarê kurdî nêşiknê.
Minbic de zî Meclîsê Keyeyanê Şehîdan eşkerayîyêke daye. Eşkerayîye de dîya zanayene ke dewletê komplogerî xîret kenê ke îradeyê şarî bişiknê û venga rêxistinan û dewletanê garantoran ame dayene ke wa bêvengîye ra fek vera bidê.
