Şaredarîya Şaristanê Girdî yê Amedî û Yewbîyayişê Weşangeranê Kurd (YEWKURD) bi çarçoveya 15ê Gulane Roşanê Ziwanê Kurdî de Meydanê Şêx Seîdî yo ke qezaya Yenîşehîrî yê Amedî de Rojanê Kitabanê Kurdî virazenê.
Amed de Meydanê Şêx Seîdî de raya verêna ke serê nameyê Rojanê Kitabanê Kurdî de weşanxaneyê kurdan teyna kitabanê xo resnenê wendekaran.
Rojê Kitaban pêşengîya Yewîya weşanxaneyanê kurdan (YEWKURD) de yena organîze kerdene. 33 weşanxane, weqif û rêxistinî, komelê sivîlî yê ke warê ziwanî de xebitîyenê beşdarê Rojanê Kitabanê Kurdî bîyî.
Nûştox û weşanger Roşan Lezgîn û Seîd Verojî derheqê Rojê Kitaban de rojnameyê ma rê qiseyî kerd.
Nê tewr aktîvîteyî qezayande zî bibê baş beno
Nuştox Roşan Lezgînî wina va: “Rojê Kitabanê Kurdî ke vîst û hewtê gulanî de dest pê kerd û heta yewê hezîranî dewam keno, muhîm ê. Semedê organîzekerdişê ena aktîvîte ez Yewîya Weşangeranê Kurdan û Beledîyeya Girde ya Diyarbekirî rê sipas kena, keyeyê înan awan bo. La mi gorê, fûara kitaban yan zî rojê kitabanê Kurdî eke eno wext de nêbiyêne, hîna baş biyêne. Çimkî nika fekê roşanî yo, şar xo rê kincan û sewbîna çî gêno, yanî bala şarî zêde kitaban ser o nîya. Di rojanê verînan miyan de ma zêde kitabî nêrotî. Faktoro bîn zî, belê, Meydanê Şêx Seîdî de organîzekerdişê Rojê Kitaban zaf muhîm o, la nika hewa germ o.
Meydan de veresnî çin ê ya, merdim verê tîjî de deyax nêkeno. Kitabî bîle, êyê ke tîjî dana piro, qabê înan des deqayî de deforme benê. Eke rojê kitaban payîzî bibiyêne hîna baş biyêne. Çimkî eno wext de zafê wendoxan hazirîya tehtîlî kenê, yanî veyşanîya wendişê kitaban payîzî hîna zêde ya. Serê gulanî de, Beledîyeya Erxenî û Eğitim-Senî yew Erxenî de fûara kitaban organîze kerdbî, ma zî beşdar biyî. Înan yew amadekarîya cidî kerdbî. Serekê beledîye û mamostayê endamê Eğitim-Senî her roje ma het de bî, her çî dir eleqedar biyêne. Coka eleqedarîya şarî zî zaf baş bî.
Gelek kitabî roşîyayî, ma zaf wendoxan dir têkilî rona û yewbînî şinasna. Eke enê tewir aktîvîteyî qezayan de bibê, ma vajê, Bismil de, Licê de, Pasûr de, Hêne de bibê zaf baş beno.”
Roşan Lezgînî wina peynî arde: “La bi o şerto ke wexto minasib de bibê û yew amadekarîya cidî bêro kerdiş. Mesela, derheqê enê Rojê Kitaban de, yew amadekarîya cidî nêbiya; reklam nêameyo kerdiş, medyaya sosyale ser o bîle zêde çî çinê yo.”
Fikir baş o la organîzasyon baş nîyo
Seîd Verojî zî seba Rojê Kitabanê Kurdî fikrê xo wina ard ziwan: Cayo ke kitabî bibê wendoxî û nuştoxî bêrê têhet û seyê fûara kitaban bibo, fikrêko baş o. Labelê bi gorê mi zaf bêwext bî, ca û wext muhîm o. Germayî zaf a, merdimî zaf alaqeder nêbenê û yan zî hayîdar nîyê. Organîze weş nêbîyo û reklam zî hinde zaf nêbîyo.”
Seîd Verojî wina dewam kerd: Nifûsê Amedî 2 mîlîyonî yo la zaf alaqederî çinîya. Weşangerî û nûştoxî zî nê rewşe ra memûn nêbî. Ez nêeşkena ke bi zerrî ra vajê rind bîyo, la ganî ma nê rewşa xo ra ders bigîrê û reyna kemanîyê anaserênî nêbê. Ma eşkenê kitabanê kurdî bi wendoxana bidê heskerdiş û bieşkêne kitabêk bigêrê û berê keyê xo û refê kitabanê kurdî de ronê, rind beno û baş beno. La nê warî de ma armancê xo û hedefe xo nêresayî. Hêvîya ma esta ke, reyna anaser kemanî nêbo û organize hîna baş bo. Ma bi rewşa asanî ra wendoxanê xo reyde têkilîya başe biveynê.”
