Dewa Zeyra ya Wêranşarî de keyeyê cerdevanan Karacadag hêrişê vera êzidîyan keno û pê kiştişî gefan waneno.

Eşkerayîya xo de êzidîyanê Zeyra pê hesna ke ê Almanya de manenê, hamnanî yenê dewe. Êzidîyan vat ke eşîra Şêxan ra keyeyê Karacadagî 25 serrî verî bi zorî dewe de cabîyo û dest nayo mal û milkanê înan ser. Eşkerayîye de wina ame vatene: “Seba ke ma êzidî yê û dewe de nîyê no keye xîret keno ke banê ma zî xesp bikero û pê kiştişî ma tehdît keno. Keyeyê Karacadagî seba ke cerdevan ê, paştîya xo daya dewlete ro û tîya de xo rê sîstemêkê zorbazîye nayo ro. Cerdevanê nê keyeyî pê çekan gefan wanenê û nêverdenê ke dewijê ke Ewropa de yê abigêrê dewe. 

5ê temmuze de nê cerdevanan rayîrê verê ma girewt û da motoranê ma yê citî ro. 11ê temmuze de zî nînan sîstemê ma yê awdayîşî şikna û ma tehdît kerdî.

Ma no serebût resna hêzanê dewlete, muracatê Serdozgerîya Komare ya Wêranşarî û qaymeqamîye kerd la çîyêko cidî nêame kerdene. Ma bi serran o vera nê kerdişan têgêrenê la çewî nê cerdevanan rê vengê xo nêkerd. Ma pêro selahîyetdar û berpirsîyaran ra wazenê ke mesuldarîya xo bikerê. Ma wazenê abigêrê erdê babî û pîranê xo ser, keye, bax û baxçeyanê xo newe ra awan bikerê la no keye tim ma rê gefan waneno.”