Meclîsê Sûryanîyan ê Ewropa ra Shleymun Elber Rhawi bale ante yewîya şaranê Rojhelatê Mîyanênî û wina vat: “Ma sey şaranê bindestan eşkenê zilmê serê xo wedarê. Gerek ma bibê yew û bi ruhê hemparî cehd bikerê.”

Rhawiyî ard ziwan ke Lozan semedê sûryanîyan zî yew travma yo û nê vatî: “Ma zî komîteya konferansî de ca genê. Badê Pêkerdişê Lozanî çîyê ke qewimîyayî gerek heme dinya tira hayîdar bo. Dejê ke şarê bindestî ancenê gerek bêrê rojdemkerdene. Têkoşîno ke şarê kurdî 30-40 serrî yo dano muhîm o. Rojawan de îdareyêko nimûne est o, her şar xo rehet îfade keno. Ma konferans na çarçewe de bikerdêne dahîna hole bîyêne. Werekna konferans de heme renganê cîyayan xo îfade bikerdêne, la heme şaran paştî nêda. Gerek şarê bindestî bibê yew ke qederê xo bibedilnê.

Badê Pêkerdişê Lozanî sey ma vera kurdan zî qirkerdiş ame kerdene. Netîceya Têkoşînê Azadîye yê Kurdistanî de vera qirkerdişan kurdî payra mendî. Coka kurdî eşkenê nika têhetameyîşê renganê cîya cîyayan rê serkêşîye bikerê. Ma weçînitişê peyênî de zî dî ke Tirkîya de heme kayî kurdan sero yenê kaykerdene. Senî ke aseno vera kurdan qirkerdişêko bîn yeno amadekerdene. Dewleta tirke heme şarî verdayî pê. Gerek ma nê kayan rê nêxapîyê. Sûryanî vanê Behtnahrin, kurdî vanê Kurdistan û armenîyî vanê Armenîstan. Heme şarê ke na cografya de yê gerek xo warê demokratîkî de îfade bikerê û heqê înan ê temsîlî bibo. Hêzê kurdan est o ke nê warê demokratîkî biafernê û ci rê serkêşîye bikerê. Ma sey şaranê bindestan eşkenê zilmê serê xo wedarê. Gerek ma bibê yew û bi ruhê hemparî cehd bikerê.”