Roje çin a ke zîndanan ra xebera pinpaykerdişê heqê merdiman nêra. Rixmê raporê ‘nêeşkena zîndan de bimana’ yê Weqfa Heqanê Merdiman ya Tirkîya tepişteya nêweşe Fatma Tokmak nêna veradayene. Rewşa weşîye ya Fatma Tokmaka ke Zîndanê Bakirkoyî de tepişîyena bena giranêr.
Avûkate Jîyan Tosuna ke Fatma Tokmak zîyaret kerd derheqê babete de qisey kerd. Tosune vist vîrî ke Fatma Tokmak de nêweşîya qelbî esta, bedenê ci masayo û çipik û pîzeyê aye bîyî mor. Tosune vat ke qelbê Tokmake bi nîzamî nêlerzeno û tim hîşê ci sereyê aye ra şino.
Tosune ard ziwan ke karantîna ra Tokmake nêwazena şora nêweşxane û pare kerd ke verî Nêweşxaneyê Sadî Konukî yê Bakirkoyî de hewte de yew gonîya ci vurîyayêne la doktorî hînî mengêke de yew û revîrê zîndanî de gonîya ci vurnenê.
Hemsereka Pêroyî ya Komeleya Heqê Merdiman (ÎHD) Eren Keskîna ke hem avûkat hem zî wasîya Tokmake ya eşkera kerd ke pêvînayîşê ci yê bi muwekîla xo yenê astengkerdene. Keskîne da zanayene ke destpêkî ra nata muwekîla ci rê bêhuqûqî yena kerdene.
Keskîne vist vîrî ke Tokmake serra 1996î de domanê xo yê 2 serreyî Azadî reyde amebî destbendkerdene, maruzê îşkenceyê giranî bîye, verê çimanê aye de bedenê lajê ci de cixare ame hewnakerdene, rixmo ke tirkî nêzanayêne bi zorî pê aye îfade ame îmzakerdene. Keskîne eşkera kerd ke Tokmake rixmo ke bêsûc a cezaya muebede dîyaye ci.
Keskîn pê hesna ke rixmê nêweşîya girane û raporê Weqfa Heqanê Merdiman a Tirkîya Fatma Tokmak nêameye veradayene. Keskîne pare kerd ke weşîya Tokmake ser o rîskêko pîl esto û ganî cade bêra veradayene.
