Kurdistan û Tirkîya de weçînitoxî bi bêsebrkî weçînayîşê 14ê Gulane pawenê. Bitaybetî Îtîfaqê Kede û Azadîye de namzedê renginî xeylê bala şarî anjenê. Elewîyî, êzidîyî, suryanîyî û çerkesî do şaran û îtîqatanê xo temsîl bikerê.
Partîyê sîyasî yê burjuwazî esasî pabesteyê sermaye yê. Kes o ke nê partîyan de polîtîka keno, seba menfaetê xo wazeno parlamento de bibo. Mîsal heyetê wezîranê Erdoganî de xeylê portreyê winayênî estê. Wezîrê Weşîye Fahrettîn Koca, Wezîrê Ekonomî Nurettîn Nebatî, Wezîrê Kultur û Turîzmî Mehmet Nurî Ersoy nê portreyan ra yê. Hem Îtîfaqê Miletî hem zî Îtîfaqê Cumhurî temsîlkarê sermaye yê. Peynîya îqtîdarê înan de bêrayîrîye, neheqdarîye, bêedaletîye esta. Labelê Îtîfaqê Kede û Azadîye temsîlkarê bindestan o. Cinîyî, kêmneteweyîyî, nasnameyê dînî ûsn. nê îtîfaqî de temsîlîyetê xo vînenê. Mabênê weçînitoxan bi Îtîfaqê Kede û Azadîye de “pragmatîzm” çin o. Têna zerrîwazîye û têkilîya îdeolojîke esta.
Mêrdîn ra George Aslan
Îtîfaqê Kede û Azadîye de tayê namzedî xeylê balkêş ê. Înan ra yew George Aslan o. Aslan Partîya Çep a Keske de Mêrdîn ra rêza 4. de namzed bî. Hetê etnîsîte ra suryanî yo. Peynameyê ci yo bîn Aryo yo. George Aryo serra 1958î de dewa Arbo ya qezaya Nisêbînî ya Mêrdînî de maya xo ra bî. Xeylê wext sîyaset de eleqedar bî û îşkenceyî dîyî. Nika wazeno ke parlamento de têkoşînê xo rayra bero.
Kiliç do çerkesan temsîl bikero
Mîyanê namzedanê Partîya Çep a Keske de nameyê Metîn Kiliçî zî bala merdimî anjeno. Kiliç Anqara de herêma 3. de namzed bî. O wazeno ke çerkesan parlamento de temsîl bikero. Goreyê eşkerayîya Metîn Kiliçî Tirkîya de teqrîben 6 mîlyon çerkesî ciwîyenê. Ziwanê ci sey ziwanê kurdan bi fermî nêno şinasnayene. Namzed Kiliç 13ê teşrîna peyêna 1959î de qezaya Bozuyukî ya Bîlecîkî de ame dinya. 20ê temmuza 2015î de wextê qetlîyamê Pirsûsî de cinîya ci Ferdane Kiliçe û lajê ci Nartan Kiliç ameyî qetilkerdene. Kêneka ey Sînem Kiliçe qetlîyam de dirbetin xelisîyaye.
Temsîlkarê êzidîyan Azad Bariş
Namzedanê Îtîfaqê Kede û Azadîye ra nameyê Azad Barişî zî xeylêk yeno şuxilnayene. O hetê nasnameyê etnîkî ra êzidî yo. Barişî Partîya Çep a Keske ra Amed de rêza 10. de ca girewt. Qezaya Wêranşarî ya Riha de ame dinya. Verê cû HDP de hetkarîya hemserekê partî kerdbî. Komelnas Azad Bariş eynî wextî de sey ronayoxê Weqfê Kulturê Êzidîyan zanîyeno. Parlamento de o do sey temsîlkarê êzidîyan cabigêro.
Elewîyî zî do parlamento de bibê
Mîyanê Partîya Çep a Keske de bêşik namzedê elewî zî estê. Mîsal Celal Firat ver de Serekê Federasyonê Komelanê Elewîyan bî. Firat Stenbol de herêma 3. de sey namzedê parlamenterîye ame ramojnayene. Xerza Firatî Turgut Oker zî Stenbol de herêma 1. de namzed bî. Xora o weçînayîşanê 7ê hezîrana 2015î de amebî weçînitene. La bado no weçînayîş ame betalkerdene. Yew zî Gulîstan Kiliç Koçyîgîte Qers ra û Tulay Hatîmogullari Oruçe Adana ra namzed bîyî.
