Tirkîya û Kurdistan de 31ê adare de weçînayîşê herêmkî qewimîyayî. Netîceya weçînayîşan de baskê îqtîdarî şikîyayî. Rejîmê seraye yo kanperest û qirker şaş bî. Hewnê Erdoganê xeripîyayî rema. Qaso ke ey “hewnters” dî. Hem şaristananê Kurdistanî hem zî Tirkîya de şarî cezayêka girse daye îqtîdarê AKP-MHPyî. Bi taybetî DEM Partî taktîkê serkewteyî şuxilnayî. Hem rojhelatê Tirkîya de hem zî Kurdistan de rejîmê Erdoganî gonî vîndî kerde.
Gama ke weçînayîş qedîya, seraya Erdoganî de “erdlerz” bî. 1ê nîsane de înan guman kerd ke “hêzêko bimbarek” înan rê yarîye keno. Çike xeylêk şaristananê Tirkîya û Kurdistanî de weçînayîş vîndî kerdbî. Efsûno ke mabênê Erdoganî û girseyan de bî, xeripîya. Mîtolojîyê yunanan de vanê “hîeros gamos (zewaco bimbarek)”. Yanî mabênê girseyanê olperestan û Erdoganî de 21 serrîyo hîeros gamos est bî. O êdî çîn o.
Serrêke verî weçînayîşê parlamenterîye û serekkomarîye qewimîyayî. Ê weçînayîşan de Erdogan serkewte bî û newe ra “serekkomar” bî. O fikrîya ke êdî her çî bi temamî destê ey de yo û şarî vileyê xo çewt kerd. Labelê nêzana ke dîktatorîya ey manena “banêkê kaxiteyinî”. Girseyanê ke raye dabî, pawitêne ke wareyê ekonomî de aramîye bêro awankerdene û xizanîye kêmî bibo. Aşme bi aşme rewşa paştîdayoxanê Erdoganî holêr nêbîye, eksê ci xirab bîye. Enflasyon kêmî nêbî û axmebîyayîşê ameyeyî de weşbîyayîş nêvirazîya. Şar hîna zêde xizan bî. Axirê şî sindoqan û cezaya “wayîrê” xo da.
Derbeya sîyasî
Tirkîya û Kurdistan de kesî texmîn nêkerdêne ke bajaranê sey Bursa, Balikesîr, Manîsa, Kutahya, Amasya û Semsûr de AKP weçînayîşî vîndî keno. Xeylêk bajaranê girdan de zî netîce Erdogan “xemgîn” kerd. Rejîmê seraye zaf hêrs bî. Dima ra hêrişê vera kurdan kerd. Mîyanê şarî de yew vateyê verênan est o. Vanê “biza ke mergê ci nêzdî yo nanê şiwaneyî wena”. Peynîya rejîmê Erdoganî yena. O zî keno ke nanê kurdan biwero. Na çarçewa de Wan de îradeyê şarê kurdî xesp kerd. Bi fermanê Erdoganî Wezaretê Edaletî vera hemşaredar Abdullah Zeydanî têgêra û mehkeme rê muracat kerd. Mehkeme zî bêusûlîye kerde û apeydayîşê heqa memnu wedarit. Bado mazbata nêdîyaye Zeydanî û eksê ci dîyaye namzedê AKPyî Abdulahat Arvasî. Na game bi rastî “derbeya sîyasî” bîye. Îradeyê şarê kurdî nêame şinasnayene.
Hukmêko girêdaye
Derbeya sîyasî de hukmê tirkan rûyê xo yo gemarin mojna. Êdî mehkemeyî, dadger û dozgerî dîktatorî rê xizmetêkê bêsînorî kenê. Ganî huqûq xoser bibo, la rejîmê Erdoganî de “emirberîye” keno. Hukm têna fermanê seraye ano ca. Verê bînaya dadgeha berze ya temyîzî de peykerê îlahe Themîse est o. Yeno zanayene ke Themîse mîtolojî de sembola edaletî ya. Rejîmê Erdoganî yo nîjadperest hetêk ra huqûqî pelixneno, hetekê bînî ra peykerê Themîse rê rêzdarîye keno.
Xoverdayîşê 3yê Nîsane
Şarê kurdî bêguman apey game nêeşte. Wayîrê îradeyê xo vejîya. Girseyî vejîyayî kuçeyan û vera kolonyalîstan xo ver da. Xoverdayîşê şarî cewab da. Mazbata newe ra dîyaye hemşaredar Abdullah Zeydanî. Xoverdayîşê 3yê Nîsane tarîxê şorişan de cayê xo girewt. Çike dewlete verê şarê kurdî de vileyê xo çewt kerd. Êdî polîtîkaya qeyûmî zî rokewte. Nê xoverdayîşî mojna ke têkoşîn zaf erjaye yo. Merdimo ke têkoşer o xo eşkeno azad bikero. Bê xoverdayîşî azadîye nêna. Kurdistan de naye ra tepîya termînêko newî dest pê keno. Kurdî do wayîrê şaredarîyanê xo bibê û cuya xo newe ra awan bikerê. Hafiz-i Şîrazî vano ke na dinya de ne emrê Xizirî maneno, ne kî milkê Îskenderî. Rejîmê Erdoganî yo boyin êdî çîn beno. Demê ameyoxî de şarê Tirkîya û Kurdistanî do qetî “sîmbîyoz” awan bikerê.
