Ji 28ê Kanûna 2025an ve li seranserî Îran û rojhilatê Kurdistanê li dijî qeyrana aborî, pirsgirêkên siyasî û civakî xwepêşandan destpêkirine. Tevî ku rejîma Îranê bi tûndtirîn şêwaz rûbirûyê xwepêşandanan dibe, lê her ku diçe xwepêşandan berfirehtir dibin.
Li gorî dîmenên hatine belavkirin, di xwepêşandanên li rojhilatê Kurdistan û Îranê de hêzên ewlekariyê yên ser bi rejîma Îranê û artêşa pasdaran, ji bo rêgirîkirina li ciwanan her cure tundiyê bikartînin; gulebarankirin, bikaranîna gaza rondikrêj û bi êşkenceyê binçavkirin. Tê gotin xwepêşanderên birîndar dibin, ji tirsa girtinê newêrin serî li nexweşxaneyan bidin.
Zanîngeh ji aliyê dezgehên ewlehiyê ve berdewam têne şopandin û zext li ser wan tê kirin û wekî yek ji navendên herî hesas ên nerazîbûnê têne hesibandin.
Xwepêşandanên gelên Îranê, li 614 navçe, 187 bajar û 31 parêzgehên rojhilatê Kurdistan û Îranê belav bûne. Heta niha 55 zanîngeh beşdarî xwepêşandanan bûne.
Li bajar û bajarokên rojhilatê Kurdistanê û li gelek bajarên Îranê, tevî astengiyên hêzên êrişkar ên rejîma Îranê, lidarxistina xwepêşandan, çalakî û nerazîbûnan berdewam dikin. Tevî vê yekê jî gelek hêzên ewlehiyê û artêşa pasdaran ji bajaran hatine derxistin û dikan, bazar û cihên giştî hatine girtin.
Herwiha, medyaya ser bi rejîma Îranê dîmenên gelek xwepêşanderan weşand ku neçar mane îtîraf bikin ku xwepêşandanan wekî serhildan bi nav kirine. Binçavkirin û girtinên rejîmê tenê bi xwepêşandan û kolanan ve sînordar nemane, bi dehan kes ji bo saziyên ewlekariyê hatine vexwendin.
Li gorî dîmenên li ser torên civakî hatine belavkirin, bi dehan malbatên ku ji bo teşhîskirina cenazeyan serdana navendan dikin, nerazîbûnên xwe nîşanî rayedaran dane.
Li gorî raporan diyare hêzên rejîma Îranê êrişên xwe yên ser xwepêşanderan didomîne, herwiha bi dehan kes hatine revandin û binçavkirin.
Li gorî Rêxistina Mafê Mirovan a HRANAyê, di nava 18 rojan de 18 hezar û 434 xwepêşander hatine binçavkirin.
Herwiha li gorî heman çavkaniyê di encama êrişên hêzên Îranê de 2 hezar û 403 xwepêşander hatine kuştin. Tê gotin ji vê hejmarê 12 kes dibin temenê 18 salî dene. Herwiha tê gotin heta niha hezar û 134 xwepêşander jî birîndar bûne.
