Komîteya Vergirewtişê Îşkenceyî (CPT) raporê Îmraliyî nêweşanena û şarê kurdî qerqilnena.

Hetkarê Hemserekanê Pêroyîyan ê HDPyî yê Komîsyonê Têkilîyanê Teberî ra Berpirsîyar Hişyar Ozsoy, Hemvervatoxa Komîsyonê Têkilîyanê Teberî yê HDPyî Feleknas Uca, Temsîlkarê Konseya Ewropa ya HDPyî Faîk Yagizay û Hemşaredara Şaredarîya Wanî Bedîa Ozgokçeya ke herinda ci de qeyûm amebî tayînkerdene, CPT de pêvînayîş kerd.

Temsîlkarê Konseya Ewropa ya HDPyî Faîk Yagizayî derheqê babete de ANFyî rê qisey kerd. Yagizayî ard ziwan ke pêvînayîşan de bale ante tecrîdê vera Rayberê Şarê Kurdî Abdullah Ocalanî ser û binpaykerdişê heqanê merdiman ser. Yagizayî da zanayene ke pêvînayîş de înan vato ke rewşa tepişteyanê sîyasîyan, tepişteyanê nêweşan û rewşa zîndanan her ke şina bena xirabêr.

Yagizayî vat: “Xora ma qala tecrîdê Îmraliyî kerde. Ma CPTyî ra waşt ke seba tepişteyanê nêweşan têbigêra. Reyna ma vat ke kurdî tecrîdê vera Ocalanî ra qerqilîyenê. Bêvengîya CPTyî ya vera Îmraliyî kurdan qerqilnena. CPTyî vat ke înan têrî çar tepişteyanê Îmraliyî de pêvînayîş kerdo. CPTyî vat ‘Ma zî wazenê bidê zanayene ke Tirkîya rê çi pêşnîyaz kerdo. La heqê weşanayîşî înîsîyatîfê Tirkîya de yo. Heta ke înan nêweşanayo ma nêeşkenê biweşanê.’ ”

Yagizayî îfade kerd ke raporî ganî bêrê weşanayene. Ey pare kerd ke raporê 2016, 2018, 2021 û ê bînî yê CPTyî zî nêameyê eşkerakerdene û vat: “Selahîyetê CPTyî çin o ke Tirkîya rê seba eşkerakerdişê raporan teda bikero. Ganî dezgehê sîyasîyî na babete de tedaya Tirkîya bikerê. Nê esasî ser o xebatê ma do dewam bikerê.”