Raywanê Azadîye ke rayraşîyayîşê xo rê dewam kenê, Sîlopîya de ard ziwan ke ê do ser bikewê û azadîya Ocalanî bîyarê ca.

Seba azadîya Serekê PKKyî Abdullah Ocalanî û çareserîya meseleya kurdan di baskan ra Rayraşîyayîşê Azadîye yo Pîl yeno kerdene. Baskê Wanî yê ‘Rayraşîyayîşê Azadîye yê Pîlî’ roja 6ine de resa qezaya Silopîya ya Şirnexî. Raywanan seba ke serrgêra erdlerzê 6ê Sibate ya, kurdeleyê sîyayî bestî yeqaya xo ra.

Girseyî heta bînaya DEM Partî ya Silopîya rayraşîyayîş kerd û dima seba mexdûranê erdlerzî deqayêk rêz girewt. 

Parlamenterê DEM Partî yê Colemêrgî Onur Duşunmezî tîya de qisey kerd û vist vîrî ke Serekê PKKyî Abdullah Ocalan 25 serrî yo binê tecrîdî de yo. Duşunmezî vat: “35 mengan ra nata Birêz Ocalanî ra xeberêke nêna girewtene. Coka ma nê rayraşîyayîşî kenê. Ma domanê Dayîke Taybete yê. Ma hemrayê Sêvêyan ê. Ma do ser bikewê, azadîya Birêz Ocalanî bîyarê ca û azadîye bîyarê nê erdî.”

Sakîne Demîra ke kênaya ci Sêvê Demîr wextê qedexeyê tebervejîyayîşî de amebî qetilkerdene vat: “Ez nê rayraşîyayîşî selam kena, ma do qetî ser bikewê. Ganî dadîyê leşker, polîs û cerdevanan zî ma hetî de bibê. Wa tecrîd wedarîyo, cenazayî zîndanan ra nêvejîyê û Serek Apo azad bibo.”

Namzetanê Şaredarîya Silopîya yê DEM Partî Jîyan Ormanli û Rênas Nadîr Onukî zî pare kerd ke Rayraşîyayîşê Azadîye do tecrîdî bişikno.