Sîyasetê şerrê topyekûnî yê verva şarê Kurdî dewam keno. Faşîzmê AKP-Erdoganî di ney sîyasetî de bi îsrar o. Bi vatişêko bîn, mecbûrê naye yo.
No îqtîdaro faşîst ke seba bi temamî tasfîyekerdişê tekoşîna azadîya ya şarê Kurdî, hetê nîzamê muessesî yê zerre û teberî ra amebî wezîfedarkerdiş, bi ser nêkewt. Bi qirêdîya ke deyabî ey, xeylê sûcêy pîlîy kerdîy. Kaosanê aborî, sîyasî û civatî reyde, Dewleta Tirke ro dewletêka çete û mafiya açarna. Bi kodanê binkeyînan êy awanbîyişê komare kaye kerd.
Xora mexsedê qirêdîya pergala mîyan-netewî zî no bi. Bi şarê Kurdî reyde dayiş şerrkerdiş, hetê aborîye ra têkberdiş û mecbûrê plananê xo êy di Rochelatê Miyanênî de kerdiş bî. Di çarçoveya ney konseptî de na qirêdîye, nika zî dewam kena. Seba naye yo ke, di binlingkerdişê heme erjanê hiqûqê zerreyî û mîyan-netewî de kerr, korr û lalîtîya xo domnenê. Heme kerdene û sûcanê verva merdimayîye êy verva şarê Kurdî rê çim û goşanê xo padanê.
Îqtîdarê Erdoganî, tim bi tifaqanê teberî reyde, bi zerreyî zî ame xurtkerdene. Rayvistina FETO’yî teqwîyeya destpêke ya ney faşîzmî bî. Di birokrasî û kayêy qilêrinan de heme meharetê înan da bikarardiş. Heme hêzêy ke di vernîya Erdoganî de kelemîy bîy, amey tasfîyekerdene.
Erdogan, bi tifaqan bi îqtîdar la di raştîye de tu wext nêwaşt îqtîdarî barre bikero. Bi no sebeb bi FETO’yî reyde pê kewtîy. Rayvistina FETO’yî, bi derrbeya tîyatro ya 15’ê Temûze amî tasfîyekerdiş. Badê naye zî tifaqê AKP-MHP û JÎTEM’î ame sazkerdene. Serra 2016’ine ra na heta zî bi ney tifaqî îqtîdarê xo domneno. Erdogan bi ney tifaqî lingan sero yo la nîmetanê îqtîdarî ra tewir zaf, Bahçelî feyde vîneno. Aktoro sereke yê ney tifaqî Bahçelî û MHP yê. Hefsarê Erdoganî nika di destê Bahçelîyî de yo. Bi vatişê verênan “def di destê Erdoganî, qopik destê Bahçelîyî de yo”. Bahçelî wext bi wext Erdoganî bi peyamêy “sublîmînalan” tehdît zî keno. Na rewşe qet ro hesabê Erdoganî nîna, la mehkûm o.
Erdogan, nika zî bi destûrê nîzamê muessesî êy zerreyî û dinya, xebatanê awankerdişê tifaqêkê zafêrî verhîrayî domneno. Pêdîyişê bi Meral Akşenere û serekê CHP’ye Ozgur Ozelî reyde di na çarçova de yê. Badê pêdîyişê yewnî tehlîyekerdişê generalan, Ozelî rê dîyarîyêke bî. Di hema roce de ro sîyasetmedaranê Kurdan birnayişê bi seserran cezanê zîndanî zî, nîşaneyê helwesta verva şarê Kurdî bî. Ozelî û CHP’yî ra di şerrê verva şarê Kurdî de hetkarîye wazeno. Do çendêke din aye de bi ser bikewo, do zeman nîşan bido.
Erdogan, neçar o di îqtîdarî de bimano. Didi sebebêy binkeyînî êy naye est ê. Ya yewine waşteka nîzamê muessesî yê dinya ya. Erdogan seba menfîetanê înan, keso ke tewir baş û rihet bêro bikarardişî yo. Di şerrê cîhanî yê 3’ine de hewceyî, bi Tirkîyayêka di bin rayirberîya Erdoganî de est a.
Şerrê NATO û Rûsîya ke Ukrayna ser ra yeno domnayiş xorî beno. Destûrê hetê Ukrayna ra bikarardişê sîlahanê Emrîka û Ewropa di Rûsîya de nîşaneyê şerrêkê verhîrayî yo. Dewletê Rocawanî wazenê di serre de aborî, her hetî ra Rûsîya bênefes biverdê. Îtîya de muhîmîya Tirkîya vecîyena orte. Rûsîya dormekerdişê aborî Tirkîya ser ra qeleşnena. Gere vernîye ro naye bêra girotiş û na bere zî ro Rûsîya bêra padayiş.
Erêkerdişê rotiş û modernîzasîyonê teyerreyanê F-36’an hetê Emrîka ra bêvengîya verva kerdene û sûcanê şerrî êy dewleta Tirke êy verva şarê Kurdî bi sebebê naye yê.
Sebebê didiyine zî tersê mehkemebîyişî yo. Na dewlete zê hijdîyayî ya û ke hewce bikero domananê xo zî wena. Nimûneyê naye di tarîxê na komare de zaf ê. Erdogan mehkemebîyişî ra zaf terseno. Seba ke nêro mehkemekerdiş gere îqtîdarî de bo.
Yewîn rayira îqtîdarî de mendişî, di şerrê verva şarê Kurdî de îsrar kerdiş o. Bi naye wazeno krîz û kaosanê aborî û sîyasî, bi raya pêroyî bido vîrîrakerdene. Reyna seba domnayişê ney şerrî, aborîye hewce ya. Na aborîye bi pereyanê narkotîk, qaçaxçîtîya însanan ya sînoran ra û hewldananê mafyatîkan yena bidestvistene. Bajarêy Şirnexe, Colemêrge û Wanî guzergahêy ney ticaretî yê. Şirnexe bi weçînêrêy kirişnayeyan amî xespkerdiş. Di roca 1’ine ya bade weçînayişê 31’ê Adare de waşt Wanî xesp bikerê. Nika zî Colemêrge.
Reyna nêy bajarî xeta sînorî yê û di şerrê verva Têgêrayişê Azadîye de seba Erdoganî bajarêy muhîm ê. Bi xespkerdişê nêy bajaran wazeno hem di wareyê aborî û hem zî di wareyê eskerî de destê xo xurt bikero. Erdogan şerrê verva şarê Kurdî zê sîgortaya ewleyîya xo vîneno. Serkewtinêkê di ney wareyî de do Erdoganî zaf sûcan ra bixelesno û bikero lîderê diseyserrîya Komare.
Perro bîn de îqtîdarê Erdoganî, îqtîdarê menfîetan o. Erdoganî bi îhale û pereyan, terîqet, cemeet, mafya û çeteyan, çînêka cîya, di Tirkîya de awan kerda. Ke menfîet û perey biqedîyê, na çîne vila bena. Di na çarçova de şaredarîy seba Erdoganî cayê weykerdişê nêy çînan ê.
Weçînayişê 31’ê Adara 2019’ine de Erdoganî bajarêy zê Stembol, Enqera, Mersîn, Antalya ke nîmeyî zafêrî aborîya Tirkîya temsîl kenê vînî kerdî bîy. Ney vînîkerdişî di wareyê rant û talanî de derrbêka pile ro Erdoganî dabî. Bi no sebeb verê xo dabî şaredarîyanê Kurdistanî û heme xesp kerdîbîy. Na raştîye di deynanê şaredarîyan de zî yena dîyiş.
Weçînayişê 31’ê Adara 2024’ine de êy verênan reyde, Kurdistan û Tirkîya de zafêrî şaredarîy amey vînîkerdiş. No zî seweknayişê dorme, terîqat û cemeetan de seba Erdoganî têkşîyişêko pîl o. Sebebanê waşteka xespkerdişê şaredarîyan ra yew zî talan û seba nêy dormeyan xuliqnayişê çimeyanê aborîye yo.
Zê vatişê peyênî, Erdogan di şerrî, şaro Kurdi di xoverdêrîye de bi îsrar ê. Seba her didi perran zî tekane rayire nay a. Ney esasî sero, tenê tekoşîn û xoverdêrîye şikenê Erdoganî bide vindarnayene. Wanî de na amî dîyiş û gere Colemêrge de zî na bêra nîşandayene. Serkewtişê Erdoganî di Colemêrge de yeno mehneyê xespkerdişê heme şaredarîyanê Kurdistanî. Xora nika ra di serre de Wan, behsê 27 şaredarîyan yeno kerdiş.
Bi no sebeb gere şaro Kurd û sîyasetê Kurdan destûr nêdê naye. Tekoşîne bi şaranê Tirkîya reyde xorî û verhîra bikerê. Karêko zehmet o la rayirêka bîne zî çîn ya. Heke Kurdîy di naye de bi ser bikewê do îqtîdarê AKP-MHP-JÎTEM’î di wextêkê kilmî de biricî yo.
Îhtîmalêko bîn zî beno waştek û zextanê nîzamê muessesî yê teber û zerreyî sero Erdogan, Ozelî ra vaco bê ma têreyde persgiraya Kurde çareser bikerê. No zî xelesîyayişê mehkemebîyişî ra rayirêke ya.
