Dewijê mezraya Tahtiravanî ya Qereyazîya ke 10 rojî yo rayîrê ci padaye yê, dîyar kerdî ke seba ke rayan nêdayî AKPyî rayîrê înan nînê akerdene
Qezaya Qereyazîye ya Erziromî de rayîrê mezraya Tahtiravanî ya pabesteyê dewa Yucelî 10 rojî yo vewre vera padaye yê. Dewe qaseyê 10 kîlometreyan durê merkezê Qereyazîye ya û seba ke rayîr padayeyê dewijê dewe nêeşkenê lazimîyanê xo bîyarê ca. Dewijê ke pê weyekerdişê heywanan debara xo kenê vatî ke vewre vera ê heywananê xo 2 kîlometreyan durî ra pê milan benê û anê.
Dewijanê dewe ra Cemîl Yavuz derheqê babete de qisey kerd. Yavuzî qiseykerdişê xo de wina vat: “Seba ke dewe weçînayîşo verên de rayan nêda AKPyî rayîrê dewe nînê akerdene. 10 rojî yo rayîr padaye yê. Rayîrê pêroyê dewanê dormeyê dewa ma akerde yê, la yê ma nînê akerdene. Seba ke m arayan nêdanê wina kenê ma. Di rojî verê cû kemçe seba akerdişê dewe ame, la bado ke Qeymeqamîye ra telefon ame, qet kemçe nêşixulna û şî. Herkes na rewşe zana. La hesabê înan nîna. Çi heqê înan esto ke ma mexdur bikerî. Ma heywanan weye kenê. Ma heywanan pê milan û paştîya xo ben û anê. Ma roje de di rayan şinê heywanan ver. 13 dewarê mi estî. Eke wina dewam bikero do pêro bimirê.”
Yavuz tewr peynî selahîyetdaran ra waşt ke mexdurîyetê înan bêro derbazkerdiş. ERZIROM
